Մադրիդի «Ատլետիկոյի» հարձակվող Անտուան Գրիզմանն ուղերձով դիմել է մադրիդյան ակումբի երկրպագուներին։ Այսօր՝ մարտի 24-ին, ֆրանսիացի ֆուտբոլիստը պայմանագիր է կնքել «Օռլանդո Սիթիի» հետ, որտեղ կտեղափոխվի այս տարվա ամռանը։
«Հեշտ չէ բառերով արտահայտել այն, ինչ զգում եմ, քանի որ այս ակումբն իմ տունն է, իսկ դուք՝ իմ ընտանիքը: Սա անհավանական ճամփորդություն էր՝ լի անմոռանալի հանդիպումներով, գոլերով, ուրախությամբ և կրքով, որը կարող են հասկանալ միայն նրանք, ովքեր իսկապես սիրում են «Ատլետիկոն»:
Բայց եկեք առայժմ ապագան թողնենք ապագային, քանի որ ես դեռ չեմ հեռանում: Ես դեռ ամիսներ ունեմ այս թիմի մարզաշապիկով. ամիսներ՝ իմ կյանքը մեր մարզադաշտում և դրանից դուրս նվիրելու, Իսպանիայի գավաթը բարձրացնելու և Չեմպիոնների լիգայում հնարավորինս հեռուն գնալու մասին երազելու համար:
Մենք դեռ երջանիկ լինելու շատ հնարավորություններ ունենք։ Ուզում եմ, որ այստեղ իմ մնացած յուրաքանչյուր րոպեն հարգանքի տուրք լինի այս ակումբի զինանշանին: Լավագույնը դեռ առջևում է, և մենք դա անելու ենք ինչպես միշտ՝ միասին։ Իմ ներկան մնում է կարմրասպիտակավուն մինչև 2026 թվականի մրցաշրջանի վերջին շունչը: Իսկ սիրտս հավերժ նվիրված կլինի «Ատլետիկոյին»,- սոցցանցերում գրել է Գրիզմանը:
Հիշեցնենք, որ Անտուան Գրիզմանն «Ատլետիկոյի» գույները պաշտպանել է 2014-ից 2019 թվականներին, որից հետո ակումբ է վերադարձել 2023 թվականին: «Ներքնակագործների» կազմում ֆրանսիացին նվաճել է Իսպանիայի սուպերգավաթը, Եվրոպայի լիգայի գավաթը և ՈւԵՖԱ-ի սուպերգավաթը։
