Գերմանիայի Բունդեսլիգայի 26-րդ տուրի շրջանակում կայացել են մի շարք ուշագրավ հանդիպումներ, որոնց կենտրոնում առաջնության առաջատարներն էին։
Լևերկուզենի «Բայ-Արենա» մարզադաշտում տեղի «Բայերը» հյուրընկալել էր Մյունխենի «Բավարիային»։ Չափազանց լարված պայքարում ընթացած դիմակայությունն ավարտվեց 1։1 հաշվով։
Արդեն 6-րդ րոպեին Ալեշ Գարսիան առաջ մղեց դաշտի տերերին։ 42-րդ րոպեին մյունխենյան ակումբը մնաց 10 մարդով՝ Նիկոլաս Ջեքսոնի ստացած ուղիղ կարմիր քարտի պատճառով։ Երկրորդ խաղակեսում Հարի Քեյնի խփած գնդակը չեղարկվեց ձեռքով խաղի պատճառով, սակայն 69-րդ րոպեին Լուիս Դիասին, այնուամենայնիվ, հաջողվեց վերականգնել հաշվի հավասարությունը։
84-րդ րոպեին նույն Դիասը ստացավ երկրորդ դեղին քարտը և հեռացվեց դաշտից, ինչի արդյունքում «Բավարիան» հանդիպումն ավարտեց ընդամենը 9 ֆուտբոլիստով։ Ավելացված ժամանակում (90+3′) լևերկուզենցիներից Յոնաս Հոֆմանի խփած հաղթական գոլն էլ չեղարկվեց խաղից դուրս վիճակի պատճառով։
Գոլերը` ԱՅՍՏԵՂ
Տուրի զուգահեռաբար ընթացող մյուս խաղում Դորտմունդի «Բորուսիան» սեփական հարկի տակ վստահ առավելության հասավ «Աուգսբուրգի» նկատմամբ՝ 2։0 հաշվով։
Դորտմունդցիների կազմում 13-րդ րոպեին հաշիվը բացեց Կարիմ Ադեյեմին, իսկ 59-ին Լուկա Ռեջանին կրկնապատկեց թիմի առավելությունը։
Այս խաղերից հետո «Բավարիան» 67 միավորով շարունակում է վստահորեն գլխավորել Բունդեսլիգայի աղյուսակը։
«Բորուսիան» 58 միավորով ամրապնդվեց 2-րդ հորիզոնականում։
«Բայերը» վաստակած 45 միավորով 6-րդն է, իսկ «Աուգսբուրգը» 31 միավորով զբաղեցնում է 9-րդ տեղը։
Մարտի 21-ին կայանալիք հաջորդ տուրում մյունխենցիները կընդունեն «Ունիոնին», դորտմունդցիները կխաղան «Համբուրգի» հետ, իսկ լևերկուզենյան ակումբը կհյուրընկալվի «Հայդենհայմին»։ Մարտի 22-ին «Աուգսբուրգը» ուժերը կչափի «Շտուտգարտի» դեմ։
Գոլերը՝ ԱՅՍՏԵՂ
Մրցաշարային աղյուսակն այս պահին
