Մադրիդի «Ռեալի» նախկին պաշտպան Մարսելոն կիսվել է «Բարսելոնայի» նախկին հարձակվող Լիոնել Մեսսիի դեմ խաղալու հիշողություններով: Բրազիլացի ֆուտբոլիստը խոստովանել է, որ արգենտինացին եղել է իր երբևէ ունեցած ամենաբարդ մրցակիցը:
«Ասել, որ նրա դեմ խաղալը պարզապես բարդ էր, կնշանակեր մեղմացնել իրականությունը: Երբեմն Մեսսիի դեմ խաղալն իսկական մղձավանջ էր»,- Մարսելոյի խոսքերը մեջբերում է FourFourTwo-ն:
Հիշեցնենք, որ Մեսսին «Բարսելոնայի» գույները պաշտպանել է 17 տարի՝ 2003-ից 2021 թվականներին։ Այդ ընթացքում նա 778 հանդիպումներում խփել է 672 գոլ և նվաճել 35 տիտղոս, այդ թվում՝ Լա Լիգայի 10 և Չեմպիոնների լիգայի 4 գավաթ: 2021-ին արգենտինացին հեռացավ կատալոնական ակումբից՝ 2 մրցաշրջան անցկացնելով ֆրանսիական ՊՍԺ-ում, իսկ 2023-ի ամառվանից հանդես է գալիս ամերիկյան «Ինտեր Մայամիում»:
Մարսելոն «արքայական» ակումբի կազմում խաղացել է 2007-ից 2022 թվականներին: Մադրիդցիների մարզաշապիկով նա անցկացրել է 546 հանդիպում, դարձել 38 գոլի և 104 արդյունավետ փոխանցման հեղինակ: Բրազիլացին 6 անգամ հռչակվել է Իսպանիայի չեմպիոն և 5 անգամ նվաճել Չեմպիոնների լիգայի գավաթը:
