Մոսկվայի «Լոկոմոտիվի» նախկին նախագահ Նիկոլայ Նաումովն արձագանքել է թիմի նախկին ֆուտբոլիստ Նաիր Թիկնիզյանի վերջին հայտարարություններին, որոնցում նա քննադատել էր մոսկովյան ակումբի գլխավոր մարզիչ Միխայիլ Գալակտիոնովին։
Ըստ Նաումովի՝ նման հրապարակային դժգոհություններով ֆուտբոլիստն առաջին հերթին հարվածում է սեփական հեղինակությանը։
«Այս իրավիճակը, որն արհեստականորեն ստեղծում է Թիկնիզյանը, վնասում է նախևառաջ հենց իրեն, ոչ թե Գալակտիոնովին։ Սա սեփական իմիջի խաթարում է։ Թիմից հեռացել ես նեղացած՝ պահիր այդ վիրավորանքդ քո մեջ, քանի որ այն ոչ մեկին հետաքրքիր չէ։ Բոլորն էլ հիանալի հասկանում են՝ եթե մարզիչը քեզ չի ընդգրկում հիմնական կազմ, ուրեմն քո մեջ ինչ-որ բան այն չէ։ Պատճառը պետք է փնտրել սեփական անձի մեջ։ Մարզիչն ինքն իր թշնամին չէ, որպեսզի ուժեղ ֆուտբոլիստին նստեցնի պահեստայինների նստարանին»,– Чемпионат-ի հետ զրույցում նշել է ակումբի նախկին ղեկավարը։
Նաումովը նաև հիշեցրել է Թիկնիզյանի՝ ԲԿՄԱ-ից (ЦСКА) «Լոկոմոտիվ» տեղափոխության շրջանը։ Նրա խոսքով՝ սկզբնական շրջանում խաղացողը հիանալի էր դրսևորում իրեն մեկնարկային կազմում, սակայն պահեստայինների նստարանին հայտնվեց միայն այն բանից հետո, երբ սկսեց նվազեցնել իր նկատմամբ պահանջկոտությունը, ինչը տրամաբանական հետևանք էր։
Անդրադառնալով Թիկնիզյանի ներկայիս ելույթներին՝ նախկին նախագահը դրական է գնահատել նրա խաղը նոր ակումբում.
«Ես հետևում եմ նրա խաղին «Ցրվենա Զվեզդայում», նա լավ տեսք ունի։ Թիմի բազմաթիվ գրոհներ կառուցվում են հենց նրա միջոցով։ Տրանսֆերային շուկայում բոլորը հետևում են քեզ, իսկ այսպիսի արտահայտություններով դու միայն վնասում ես ինքդ քեզ։ Թիկնիզյանը պետք է վերջ տա վիրավորվածություն ցույց տալուն և պարզապես ֆուտբոլ խաղա»։
Հավելենք, որ հայ պաշտպանը սերբական ակումբ է տեղափոխվել 2025 թվականի ամռանը։ Նրա գործող պայմանագրի ժամկետը նախատեսված է մինչև 2028 թվականի հունիսի 30-ը, իսկ տրանսֆերային արժեքը գնահատվում է շուրջ 4,5 միլիոն եվրո։
