«Բարսելոնայի» նախկին հարձակվող Թիերի Անրին խոսել է կատալոնական ակումբի ներկայիս խնդիրների մասին՝ ընդգծելով, որ թիմին անհրաժեշտ է բարձրակարգ և փորձառու կենտրոնական հարձակվող՝ գոլային պահերի իրացումը բարելավելու համար։
««Բարսելոնային» անհրաժեշտ է իսկական «9 համար», բարձրակարգ մակարդակի հարձակվող։ Նկատի ունեմ այնպիսի խաղացողների, ինչպիսիք են Օսիմհենը, Հալանդը կամ Քեյնը։ Թիմին պետք են արդեն կայացած գոլահարներ, այլ ոչ թե պարզապես հեռանկարային ֆուտբոլիստներ։
Երբ քո կազմում կա Լամին Յամալի նման տաղանդ, նրա փոխանցումներից հետո գոլ խփելը շատ ավելի հեշտ է դառնում։ Նման բարձր մակարդակում մեկ հնարավորությունն արդեն իսկ պետք է բավարար լինի գրոհը եզրափակելու համար։ Ես հետևել եմ հանդիպումների, որտեղ նրանք չափազանց շատ գոլային պահեր են կորցնում։ «Բարսելոնայում» նման բան չպետք է լինի», — Անրիի խոսքերն է մեջբերում իսպանական Sport պարբերականը
Նշենք, որ այս պահին «Բարսելոնան» Իսպանիայի Լա լիգայի մրցաշարային աղյուսակում զբաղեցնում է երկրորդ հորիզոնականը՝ առաջատար Մադրիդի «Ռեալին» զիջելով երկու միավորով։
