Իսպանիայի ազգային հավաքականի գլխավոր մարզիչ Լուիս դե լա Ֆուենտեն, ըստ ամենայնի, չի դիտարկում «Բարսելոնայի» պաշտպան Էրիկ Գարսիայի մասնակցությունը 2026 թվականի աշխարհի առաջնությանը։
El Nacional-ի տեղեկություններով՝ իսպանացի մասնագետն արդեն քննարկել է իրավիճակը կատալոնական ակումբի մեկ այլ պաշտպանի՝ Պաու Կուբարսիի հետ՝ հասկացնելով, որ Գարսիան, ամենայն հավանականությամբ, դուրս կմնա վերջնական հայտացուցակից։
Որոշման հիմնական դրդապատճառը հավաքականում ներքին հավասարակշռության և կայուն մթնոլորտի պահպանումն է։ Դե լա Ֆուենտեն շեշտը դնում է փորձված կորիզի վրա՝ վստահելով այն ֆուտբոլիստներին, որոնք նվաճեցին Եվրո-2024-ի չեմպիոնի տիտղոսը։ Մարզիչը չի ցանկանում վտանգել թիմային քիմիան խոշոր մրցաշարից առաջ։
Սակայն մարզչական շտաբի այս դիրքորոշումը հատկապես աղմկահարույց է՝ հաշվի առնելով Գարսիայի ներկայիս կարգավիճակը «Բարսելոնայում»։ Ընթացիկ մրցաշրջանում նա դարձել է թիմի առանցքային ֆիգուրներից մեկը. վստահորեն գործում է ինչպես պաշտպանության կենտրոնում և աջ եզրում, այնպես էլ հենակետային գոտում։ Ավելին, Գարսիան ակումբի առաջատարն է ստացած խաղաժամանակի ցուցանիշով։
25-ամյա ֆուտբոլիստն ընթացիկ արշավում արդեն մասնակցել է 36 հանդիպման՝ դառնալով մեկ գոլի և մեկ գոլային փոխանցման հեղինակ՝ մնալով Հանս-Դիտեր Ֆլիկի խաղային մոդելի անփոխարինելի տարրը։
Այնուամենայնիվ, Իսպանիայի ընտրանու մարզչական անձնակազմը նախապատվությունը տալիս է ոչ թե ակումբային հաջողություններին, այլ կոլեկտիվի համախմբվածությանն ու կառավարելիությանը՝ սկզբունքներ, որոնք Դե լա Ֆուենտեն համարում է ԱԱ-2026-ում հաջողության հասնելու գլխավոր գրավականը։
