Կատալոնական «Բարսելոնան» գլխավորում է աշխարհի այն ակումբների վարկանիշային աղյուսակը, որոնք ունեն ամենաբարձր տրանսֆերային արժեքն ունեցող սեփական սաները։
Սպորտային հետազոտությունների միջազգային կենտրոնի (CIES Football Observatory) տվյալներով՝ «կապտանռնագույնների» համակարգում գրանցված (ներառյալ վարձակալությամբ այլ թիմերում հանդես եկող) սաների ընդհանուր տրանսֆերային արժեքը կազմում է 738 միլիոն եվրո։ Սա լավագույն ցուցանիշն է համաշխարհային ֆուտբոլում։
Ակումբի ամենաթանկարժեք սանը եզրային հարձակվող Լամին Յամալն է, ում տրանսֆերային արժեքը գնահատվում է 335 միլիոն եվրո։
Կարևոր է նշել, որ CIES-ի կիրառած վիճակագրական ալգորիթմները հաճախ սահմանում են զգալիորեն ավելի բարձր արժեքներ, քան ընդունված է տեսնել Transfermarkt-ում։ Սա պայմանավորված է ֆուտբոլիստների տարիքի, պայմանագրի ժամկետի և զարգացման պոտենցիալի առանձնահատուկ հաշվարկով, ինչի արդյունքում ցուցակի առաջատարների գները ստացվել են «աստղաբաշխական»։
Սեփական սաների ընդհանուր արժեքով աշխարհի լավագույն 10 ակումբները
- «Բարսելոնա» | 738 մլն | Լամին Յամալ (335 մլն)
- «Մանչեսթեր Սիթի» | 286 մլն | Նիկո Օ’Ռայլի (92 մլն)
- «Բավարիա» | 284 մլն | Ջամալ Մուսիալա (87 մլն)
- «Ռեալ Մադրիդ» | 256 մլն | Ալվարո Կարերաս (79 մլն)
- «Արսենալ» | 235 մլն | Մայլզ Լյուիս-Սկելլի (80 մլն)
- «Չելսի» | 222 մլն | Լիվայ Կոլուիլ (67 մլն)
- «Ատլետիկ Բիլբաո» | 211 մլն | Նիկո Ուիլյամս (53 մլն)
- «Ռեալ Սոսյեդադ» | 205 մլն | Խոն Մարտին (35 մլն)
- «ՊՍԺ» | 204 մլն | Ուորեն Զաիր-Էմերի (87 մլն)
- «Ատլետիկո Մադրիդ» | 186 մլն | Պաբլո Բարիոս (87 մլն)
