Ֆրանսիական «Լիոնի» ֆուտբոլիստի կարգավիճակում իր շնորհանդեսի ժամանակ բրազիլացի հարձակվող Էնդրիկը հաստատել է, որ Կառլո Անչելոտին է իրեն խորհուրդ տվել վարձավճարով տեղափոխվել Լիգա 1։
Առաջին մարզումից մեկ շաբաթ անց Էնդրիկը պաշտոնապես ներկայացվել է որպես «Լիոնի» նոր խաղացող։ Հարձակվողը, որը Ֆրանսիայում վարձավճարով հանդես է գալու մինչև 2026 թվականի հունիսը, ծավալուն մամուլի ասուլիս է տվել։ Նա խոստովանել է, որ Անչելոտին իրեն խորհուրդ է տվել ժամանակավորապես լքել «Ռեալը»՝ խաղային որակները զարգացնելու համար։ Էնդրիկը նշել է, որ միացել է մի ակումբի, որին ցանկանում է օգնել տիտղոսներ նվաճել և որտեղ կկարողանա դրսևորել իր լավագույն որակները։
— Ի՞նչ է նշանակում ձեզ համար «Լիոնը»։
«Երբ «Լիոնը» կապ հաստատեց ինձ հետ, դա շատ կարևոր պահ էր թե՛ ինձ, թե՛ կնոջս և թե՛ ընտանիքիս համար։ Իմ գործակալ Ֆրեդը զրուցեց ինձ հետ, և մենք հասկացանք, որ այստեղ գալը ճիշտ քայլ կլինի, քանի որ կարևոր էր խաղալը։ Երբ Աստված խոսում է ինձ հետ, Նա ցույց է տալիս այն ճանապարհը, որով պետք է շարժվեմ։ Միտքս ու սիրտս այժմ այստեղ՝ «Լիոնում» են։ Ես շատ եմ աշխատել այս թիմին օգնելու համար։ Շնորհակալ եմ Աստծուն, «Լիոնի» ղեկավարությանը և անձնակազմին՝ գործադրած ջանքերի համար»։
— Ինչպիսի՞ն էին «Ռեալում» անցկացրած վերջին վեց ամիսները։
«Դրանք իմ կյանքի լավագույն վեց ամիսներն էին։ Ժամանակ ունեցա կնոջս հետ լինելու, տունս կառուցելու համար։ Առանց այս ամենի՝ առանց նոր տան և ընտանիքի, ես ոչինչ եմ։ Հիմա ես ավելի լավն եմ դարձել։ Հասունացել եմ որպես անհատ և դարձել ավելի լավ մարդ։ Այժմ կենտրոնացած եմ իմ աշխատանքի վրա։ Շնորհակալ եմ Աստծուն և բոլոր այն մարդկանց, ովքեր եղել են իմ կողքին։ Կրկնում եմ՝ այդ վեց ամիսներն իմ կյանքում լավագույնն էին»։
— Արդյո՞ք «Լիոնին» ճանաչելը կօգնի ադապտացիային։
«Երբ իմացա, որ «Լիոնը» լինելու է իմ հաջորդ հանգրվանը, սկսեցի դիտել թիմի խաղերը։ Խոսել եմ գլխավոր մարզիչ Պաուլո Ֆոնսեկայի հետ։ Արդեն մարզվել եմ թիմի հետ, նույնիսկ հասցրել եմ կատակել թիմակիցներիս հետ։ Ինչպես նշեցի, շատ ուրախ եմ այստեղ գտնվելու համար»։
— Ո՞վ է խորհուրդ տվել ընտրել «Լիոնը»։
«Ես շարունակում էի աշխատել խաղադաշտում և օգնել «Ռեալին»։ Այո, մամուլում լուրեր հայտնվեցին, և թիմակիցներս մոտենում ու հարցնում էին՝ գնում եմ, թե ոչ։ Մենք ծիծաղում էինք այդ թեմայով։ Որոշ տղաների հետ քննարկել եմ մամուլում գրվածը։ Ինձ համար կարևոր է խոսել թիմակիցներիս հետ և պահպանել կապը նրանց հետ։ Սակայն ամենակարևորը այն է, որ հիմա ես «Լիոնում» եմ։
Շատ հաճելի էր տեսնել այն ոգևորությունը, որը առաջացել էր, և երկրպագուներին, ովքեր եկել էին, որպեսզի ստորագրեի նրանց մարզաշապիկները։ Դա դիպչում է սրտիս։ Ինձ համար սա կարևոր է, քանի որ իմ գալուստը «Լիոն» կմեծացնի ակումբի և Լիգա 1-ի տեսանելիությունը Բրազիլիայում։ Ավելի շատ երիտասարդներ կսկսեն հետևել Ֆրանսիայում տեղի ունեցող իրադարձություններին։ Կարևոր է շփվել երկրպագուների հետ և պահպանել այդ ոգևորությունը»։
— Խոսե՞լ եք արդյոք Անչելոտիի հետ մինչ տեղափոխությունը։
«Այո, խոսել եմ Անչելոտիի հետ, և նա ինձ ցուցումներ տվեց՝ որպես խաղացող կատարելագործվելու համար։ Նրա խորհուրդները հասան իմ սրտին։ Նա ասաց. «Գնա՛, զարգացրու քո ֆուտբոլը, ես ուզում եմ, որ դու երջանիկ լինես»։ Թեև որոշումս կայացրել էի մինչ այդ, նրա խոսքերը շատ կարևոր էին։ Անչելոտին մեծ մարզիչ է եղել «Ռեալի» հետ։ Ես հետևել եմ նրա բոլոր խորհուրդներին, և դա օգնել է ինձ զարգացնել խաղս։ Հիմա պետք է աշխատեմ, որպեսզի խաղամ և օգնեմ «Լիոնին» հաղթել… Հրաշալի է նաև այն, որ մարզիչ Ֆոնսեկան և նրա շտաբը խոսում են պորտուգալերեն»։
— Ինչպե՞ս եք վերաբերում ճնշմանը։
«Ես արդեն խաղացել եմ Բրազիլիայում, որտեղ ճնշումն իսկապես մեծ է։ Այն, ինչ ես անում եմ, ֆուտբոլ խաղալն է, և դա ամենակարևորն է։ Ճիշտ է, Բրազիլիայում մարդիկ շատ ուշադիր են իմ ամեն քայլի նկատմամբ։ Նրանք վերլուծում են իմ կյանքը, և հիմա էլ կվերլուծեն այն, ինչ անում եմ «Լիոնում»։ Սակայն ես ապրում եմ իմ կյանքով։ Շնորհակալ եմ բոլոր նրանց, ովքեր հետևում են ինձ, բայց միակ բանը, որ ցանկանում եմ, լավ կարիերա ունենալն է և խաղադաշտի վրա կենտրոնանալը», — Էնդրիկի խոսքերը մեջբերում է AS-ը։
