🎥📷 Էնթոնի Ջոշուան կոտրեց Ջեյք Փոլի ծնոտն ու մարտահրավեր նետեց Ֆյուրիին

Մայամիում կայացած բռնցքամարտի երեկոյի ընթացքում ծանր քաշային կարգում WBA, WBO և IBF վարկածներով աշխարհի նախկին չեմպիոն Էնթոնի Ջոշուան վստահ հաղթանակ տարավ հայտնի բլոգեր Ջեյք Փոլի նկատմամբ։

8 ռաունդանոց ձևաչափով նախատեսված մենամարտը (յուրաքանչյուրը՝ 3 րոպե) ավարտվեց 6-րդ ռաունդում, երբ բրիտանացին նոկաուտի ենթարկեց ամերիկացուն։ Այս հաղթանակից հետո 36-ամյա Ջոշուայի ցուցանիշը պրոֆեսիոնալ ռինգում դարձավ 29 հաղթանակ (26-ը՝ նոկաուտով) և 4 պարտություն։ 28-ամյա Փոլի համար սա 14-րդ մենամարտն էր, որտեղ նա կրեց իր 2-րդ պարտությունը (ունի 12 հաղթանակ)։

«Ռոկկիի» սցենարը չստացվեց․ մենամարտի ընթացքը

Չնայած նախնական մեծ աղմուկին՝ մենամարտի առաջին 4 ռաունդներն անցան բավականին պասիվ մթնոլորտում։ Ջոշուան չէր շտապում իրադարձությունների զարգացման հարցում՝ գործելով զգուշավոր և երբեմն հարվածներ հասցնելով ոչ թե գլխին, այլ մրցակցի իրանին։ Ջեյք Փոլը, գիտակցելով ուժերի տարբերությունը, հիմնականում զբաղված էր պաշտպանվելով և ռինգում տեղաշարժվելով, ինչը նույնիսկ հանգեցրեց մրցավարի դժգոհությանը, ով կոչ արեց կողմերին անցնել իրական գործողությունների։

5-րդ ռաունդում իրավիճակը փոխվեց․ Ջոշուան մեծացրեց ճնշումը, ինչին հաջորդեցին նոկդաունները։ Փոլը փորձում էր տոկունություն ցուցաբերել, սակայն 6-րդ ռաունդում բրիտանացու աջ ձեռքի հուժկու հարվածը վերջակետ դրեց մենամարտին՝ կոտրելով բլոգերի ծնոտը։

 

Посмотреть эту публикацию в Instagram

 

Публикация от ММА, бокс и другие единоборства 👊🥊 (@shavkat_fighters)

Բիզնես, թե՞ սպորտ

Շատ վերլուծաբաններ այս մենամարտը դիտարկում էին որպես հերթական կոմերցիոն նախագիծ։ Ջեյք Փոլը, ով իր կարիերայի ընթացքում մրցել է բասկետբոլիստների, MMA մարտիկների և վետերանների (այդ թվում՝ 58-ամյա Մայք Թայսոնի) հետ, այս անգամ ևս կարողացավ վաճառել «աութսայդերի սխրանքի» պատմությունը։ Սակայն իրականությունն այլ էր․ պրոֆեսիոնալ բռնցքամարտիկի հետ հանդիպումը Փոլի համար ավարտվեց ծանր վնասվածքով։

Ջոշուայի համար այս հաղթանակը ոչ միայն ֆինանսապես շահավետ էր, այլև հարթակ հանդիսացավ հաջորդ քայլի համար։ Հենց ռինգում նա մարտահրավեր նետեց իր վաղեմի մրցակից Թայսոն Ֆյուրիին։

«Եթե Թայսոն Ֆյուրին լուրջ է տրամադրված, թող մի կողմ դնի սոցցանցերն ու հագնի բռնցքամարտի ձեռնոցները։ Դուրս արի ռինգ, եթե այդքան ուժեղ ես»,- հայտարարել է Էյ Ջեյը։

Մինչ Ջեյք Փոլը կզբաղվի առողջության վերականգնմամբ և իր պրոմոուտերական գործունեությամբ, բռնցքամարտի աշխարհը սպասում է Ջոշուա-Ֆյուրի հավանական դիմակայությանը, որն արդեն իսկական սպորտային իրադարձություն կլինի, այլ ոչ թե շոու-ներկայացում։