«Ալ-Իթիհադի» հարձակվող Կարիմ Բենզեման բացառիկ հարցազրույց է տվել իսպանական AS-ին, որտեղ անդրադարձել է իր ապագային, «Ռեալ Մադրիդ» վերադառնալու հավանականությանը և գնահատել ներկայիս «Արքայական ակումբի» ներուժը։
Ֆրանսիացի հարձակվողը, ով Սաուդյան Արաբիայում հաղթել է Լիգան և Թագավորի գավաթը, նշել է, որ մտադիր է խաղալ ևս երկու տարի։
«Ես 37 տարեկան եմ, բայց ինձ լավ եմ զգում և ցանկություն ունեմ ևս երկու տարի խաղալու։ Ես այստեղ եկա որպես «Ոսկե գնդակի» դափնեկիր, ես խոստումներ եմ կատարել, բայց չեմ պատրաստվում մնալ հանուն մնալու», — նշել է Բենզեման։
Հարցազրույցի ամենաազդեցիկ պահերից մեկը Բենզեմայի պատմությունն էր 2009 թվականին «Ռեալ» տեղափոխվելու մասին։ Նա վերհիշել է այն օրը, երբ Ֆլորենտինո Պերեսն անձամբ այցելել է իրենց տուն Լիոնում՝ նրան համոզելու միանալ «Արքայական ակումբին»։
«Իմ գործակալն ասաց, որ պետք է մեկին հանդիպեմ։ Երբ իմացա, որ դա Ֆլորենտինո Պերեսն է, չհավատացի։ Այն մարդը, ով բերել էր Ռոնալդուին, իմ տա՞նն էր։ Ես շոկի մեջ էի, — պատմել է Բենզեման։ — Նա նստած էր ծնողներիս հետ, ֆրանսերեն էր խոսում։ Այդ պահից ես մտածում էի միայն «Ռեալի» մասին»։
Այս անձնական կապը բացատրում է նրա անսահման հավատարմությունը։ Հարցին, թե կվերադառնա արդյոք, եթե Պերեսը զանգահարի, ֆուտբոլիստը, ծիծաղելով, պատասխանել է.
«Ֆլորենտինոն այն մարդն է, ում ես երբեք չեմ կարող «ոչ» ասել։ Նա ինձ տվեց ամեն ինչ՝ վստահություն, և միշտ եղել է իմ կողքին՝ թե՛ լավ, թե՛ վատ պահերին։ Նրան չի կարելի մերժել»։
Բենզեման նաև ընդգծել է իր սերը «Ռեալի» նկատմամբ՝ այն անվանելով աշխարհի լավագույն ակումբ։
«Ես դեռ դիտում եմ խաղերը, երբ կարողանում եմ։ Այնտեղ միշտ այդպես է՝ մեկ ոչ-ոքի կամ պարտություն, և արդեն ճգնաժամի մասին են խոսում։ Դա նորմալ է»։
Վինիսիուսի մասին. «Նա ֆենոմեն է, մեծ սրտով։ Մարդիկ նրա վրա չափազանց մեծ ճնշում են գործադրում։ Նա կարող է մի օր նվաճել «Ոսկե գնդակը»։ Դա տեղի կունենա այն օրը, երբ նա գիտակցի, որ խաղադաշտում է միայն խաղալու համար»։
Մբապեի և նոր եռյակի մասին. «Նրանք (Մբապեն, Վինին, Բելինգհեմը) պետք է խոսեն խաղադաշտում։ Պետք չէ Բելինգհեմին ասել, որ գոլեր խփի, դրա համար կա Մբապեն։ Կիլիանը «Ռեալում» շատ ավելի շատ գոլեր կխփի, քան ՊՍԺ-ում»։
Ռոնալդուի հետ «սառը» ողջույնի մասին. «Խնդրում եմ։ Մենք խոսել ու գրկախառնվել էինք հանդերձարանում։ Մենք կարիք չունենք ինչ-որ բան ցույց տալու տեսախցիկների առջև։ Մենք մեծ հարգանք ունենք միմյանց նկատմամբ»։
Իր կարիերայի ավարտի վերաբերյալ Բենզեման նշել է, որ պայմանագիրն ավարտվում է։ «Դեկտեմբերին կդառնամ 38 տարեկան, բայց ինձ տեսնում եմ ֆուտբոլում ևս 2 տարի։ Այս պահին ինձ լավ եմ զգում այստեղ, սակայն առաջարկներ ունեմ Եվրոպայից։ Պետք է ամեն ինչ դիտարկեմ և ճիշտ ընտրություն կայացնեմ»։
