Պորտուգալիայի ազգային հավաքականի գլխավոր մարզիչ Ռոբերտո Մարտինեսն Աշխարհի 2026թ․ առաջնության եվրոպական գոտու որակավորման փուլի Պորտուգալիա — Հայաստան հանդիպումից առաջ պատասխանել է լրագրողների հարցերին։ Քննարկվել է Ռոնալդուի հեռացումը, թիմի հոգեբանական վիճակը և երկրպագուների աջակցության կարևորությունը։
«Մեր թիմն ունի մեծ պատասխանատվություն և բարձր ինքնաքննադատական մոտեցում։ Միշտ փորձում ենք ստեղծել միջավայր, որտեղ կարող ենք աճել՝ անկախ արդյունքից։ Պարտությունից հետո՝ առավել ևս։ Այժմ բոլորս տխուր ենք։ Այդ խաղի մասին արդեն խոսել եմ, հիմա դրա ժամանակը չէ։ Տխրությունը հնարավորություն է։ Վաղը խաղում ենք տանը, մեր երկրպագուների առաջ։ Հակառակորդին հարգում ենք, բայց ուզում ենք ցույց տալ մեր իրական որակը և ապահովել աշխարհի առաջնության ուղեգիրը։ Մեր ամբողջ ուշադրությունը վաղվա խաղի վրա է։
Երեկվա մարզման ժամանակ տեսա ֆուտբոլիստների, որոնք լի էին էներգիայով, բարձր տրամադրությամբ ու անկեղծ ցանկությամբ՝ ներկայացնելու իրենց լավագույն մարզավիճակը։ Ընտրական այս փուլը բավականին տարօրինակ է՝ ընդամենը վեց հանդիպումով, սակայն թիմը գտնվում է գերազանց վիճակում և լիովին պատրաստ է՝ ամբողջ ներուժով հանդես գալու Հայաստանի դեմ։
«Դրագաու» մարզադաշտում մենք արդեն ստեղծել ենք բազմաթիվ հզոր հիշողություններ։ Թիմը շատ լավ է զգում երկրպագուների աջակցությունը, այն բառացիորեն փոխում է խաղի ընթացքը։ Վաղը մենք անպայման կօգտվենք այդ ուժից։
Ինչո՞ւ եմ պաշտպանում Ռոնալդուին։ Խաղից անմիջապես հետո պահը միշտ ծանր է, էմոցիաները՝ խառը։ Բայց տեսել եմ նրա արձագանքը շարունակական սադրանքներին, որոնք սկսվել էին դեռ առաջին րոպեներից։ Սա ո՛չ բռնի գործողություն էր, ո՛չ էլ կարմիր քարտի արժանի ուժային միջամտություն։ Դա պարզապես պատասխան էր սադրանքին։ Մենք պետք է ներկայացնենք դրվագը ճիշտ ու ամբողջական կերպով։ Եվ անկեղծ ասած՝ չափազանց անարդար կլինի, եթե նրան երկարատև որակազրկեն։
Կվերադառնա՞ արդյոք Ռոնալդուն «Դրագաու»։ Մեր մոտեցումն անփոփոխ է։ Եթե խաղացողը վնասվածք ունի կամ որակազրկված է, չի մնում հավաքականում, քանի որ չի կարող կենտրոնացած լինել խաղի վրա։ Միշտ էլ այսպես ենք գործել։ Այդպիսի հարցերը անհարգալից են թե՛ Ռոնալդուի, թե՛ ներկայիս թիմի նկատմամբ։ Դա նույնն է, ինչ նրա նվիրվածությունը կասկածի տակ դնելը։ Նրա մոտեցումն անբիծ է։ Այժմ նա չի կարող մեզ հետ լինել, քանի որ կա պատճառ։ Դա մեր աշխատանքի սկզբունքն է։
Մեզ մեկ մարզում է մնացել, ու մեկնարկային կազմը չեմ բացահայտի։ Մենք աշխատում ենք այնպես, որ յուրաքանչյուր դիրքում լինեն երկու հավասարարժեք խաղացողներ։ Գոնսալու Ռամուշը դասական կենտրոնական հարձակվող է և արդեն մի քանի բարձրակարգ խաղ է անցկացրել հավաքականում։ Նա Եվրոպայում գոլ/րոպե ցուցանիշով ամենաարդյունավետներից է։ Շատ կարևոր խաղացող է։ Կազմը չեմ ասի, բայց նա կարևոր դեր կունենա։
Շատերը չգիտեին՝ ինչ սպասել Հայաստանի հավաքականից առաջին տուրի խաղում։ Նոր մարզիչը շատ քիչ ժամանակ ուներ մեր դեմ իր առաջին խաղից առաջ, բայց թիմը խելացի է, կարողանում է խաղալ և ստեղծագործական ներուժ ունի։ Պաշտպանությունում նրանք ունեն 5 խաղացողից կազմված կազմակերպված գիծ։ Հայաստանը լավ խաղեր է անցկացրել, բայց նրանց բախտը չի բերել։ Հայաստանի հավաքականը շատ մրցունակ թիմ է, որին մենք հարգանքով ենք վերաբերվում։ Ինձ դուր է գալիս նրանց մարզչի աշխատանքը»,- նշել է Մարտինեսը։
Հիշեցնենք, որ ԱԱ-2026-ի ընտրական մրցաշարի F խմբի վերջին տուրի Պորտուգալիա — Հայաստան հանդիպումը կկայանա վաղը՝ նոյեմբերի 16-ին։
