«Բարսելոնայի» մամուլի ծառայությունը ակումբի պաշտոնական կայքում հիմնական թիմի կազմում ավելացրել է հայտնի բրիտանացի փոփ երգիչ Էդ Շիրանին։
Կատալոնական ակումբը պարբերաբար ակցիաներ է անցկացնում հանրահայտ Spotify ծառայության հետ համագործակցության շրջանակներում, և նախկինում ակումբի մարզաշապիկների վրա հայտնվել են համաշխարհային երաժշտության հայտնի աստղեր։
Շիրանը կապտանռնագույնների կողմից ընդգրկվել է թիմի կիսապաշտպանների շարքում։
Նշենք, որ բրիտանացի երգչի հետ համագործակցությունը նվիրված էր հոկտեմբերի 26-ին Մադրիդում կայանալիք Մադրիդի «Ռեալի» հետ առաջիկա «Էլ Կլասիկոյին»։ Բացի այդ, ըստ Footy Headlines-ի տեղեկությունների, խաղացողների մարզաշապիկների վրա կլինեն այն խորհրդանիշները, որոնք Շիրանն օգտագործել է իր ալբոմները անվանելու համար։
Հիշեցնենք, որ նախկինում «Բարսելոնան» արդեն համագործակցել է այնպիսի կատարողների հետ, ինչպիսիք են Դրեյքը, Ռոզալիան, The Rolling Stones-ը, KAROL G-ն, Coldplay-ը և Թրևիս Սքոթը։
