«Ինտերի» նախագահ Ջուզեպե Մարոտան խոսել է իտալական ֆուտբոլի ներկայիս մարտահավերների մասին՝ ընդգծելով, որ Սերիա Ա-ն կորցրել է իր նախկին փայլը։
Իտալական ֆուտբոլը գտնվում է անկման փուլում։ Մենք վերածվել ենք անցումային լիգայի, որտեղ այլևս չկա այն գրավչությունը, որն ունեինք 2000-ականներին։ Այժմ խոշոր աստղերը գալիս են Իտալիա, երբ արդեն մոտենում են կարիերայի մայրամուտին։
Մարոտան նշել է տրանսֆերային շուկայի սահմանափակությունները՝ որպես հիմնական խնդիր։
Օրինակ՝ «Ռեալը» 60 միլիոն եվրո է վճարել երիտասարդ Մաստանտուոնոյի համար, մինչդեռ Իտալիայում ակումբները հազվադեպ են երիտասարդ խաղացողի համար վճարում 35 միլիոն եվրոյից ավելի։ Տրանսֆերային շուկան այստեղ խիստ սահմանափակ է։
Նա ընդգծել է, որ խոշոր ակումբները՝ «Ինտերը», «Միլանը», «Յուվենտուսը», «Ռոման», «Նապոլին» և «Ատալանտան», կենտրոնացած են ֆինանսական կայունության վրա։
2000-ականներին խաղացողների վաճառքը հազվադեպ էր, սակայն այսօր առանց դրա դժվար է ապահովել կայուն ֆինանսական հաշվետվություն։
Բացի այդ, Մարոտան նշել է արտասահմանյան հեռարձակման իրավունքների շուկայի խնդիրը։
Կարևոր խնդիր է նաև արտասահմանյան հեռարձակման իրավունքների շուկան, որտեղ մեր եկամուտները զգալիորեն զիջում են այլ առաջնություններին՝ երբեմն 10 անգամ։
Աղբյուր՝ Tuttomercatoweb
