«Բարսելոնայի» մարզական տնօրեն Դեկուն պատմել է, որ ակումբը որևէ իրական փորձ չի ձեռնարկել պայմանագիր կնքելու Իսպանիայի հավաքականի և Բիլբաոյի «Ատլետիկի» եզրային հարձակվող Նիկո Ուիլյամսի հետ։
«Չեմ ցանկանում բացահայտել բանակցությունների մանրամասները, քանի որ գործնական հարաբերություններ ունեմ ֆուտբոլիստների գործակալների հետ և չպետք է դրանք հանրայնացնեմ։
Յուրաքանչյուրը ձգտում է աշխատել իր խաղացողի համար, դա նորմալ է, և ես այդ ամենի մանրամասները չեմ ցանկանա նշել։ Պարզապես պարզաբանելու համար կարող եմ ասել, որ մենք Նիկո Ուիլյամսին չենք դիմել, այլ նրա գործակալն է մեզ դիմել։
Եվ եթե Լուիս Դիասի և Մարկուս Ռեշֆորդի բանակցությունները մի փոքր բարդ էին ընթանում, ապա մենք պետք է նոր լուծումներ փնտրեինք։ Բայց Նիկոյի հետ չստացվեց, և վերջ․ մեր միջև ոչ մի խնդիր չկա»,- ասել է Դեկուն Mundo Deportivo-ին տված հարցազրույցում։
Հիշեցնենք՝ ինչպես նախորդ տարի, այնպես էլ 2025 թվականի ամառային տրանսֆերային պատուհանի ընթացքում Ուիլյամսի «Բարսելոնա» տեղափոխությունը չկայացավ։ Թեպետ տրանսֆերը համարվում էր գրեթե ավարտված, ֆուտբոլիստը վերջին պահին երկարաժամկետ պայմանագիր կնքեց բասկյան ակումբի հետ՝ մինչև 2035 թվականը։
