Խաղում է Հայաստանում և ցանկություն ունի մեզ համար․ A Bola-ն՝ Էլդեր Ֆերեյրայի մասին

Հայաստանի չեմպիոն «Նոայի» հարձակվող Էլդեր Ֆերեյրան A Bola-ի հետ զրույցում պատմել է Հայաստան տեղափոխվելու մասին և հաստատել, որ ներկա է լինելու Հայաստանի և Պորտուգալիայի հավաքականների միջև հանդիպմանը։

Ահա թե ինչ է գրում A Bola-ն «Նոայի» մասին․

Շաբաթ օրը Պորտուգալիայի հավաքականը կմեկնարկի 2026 թվականի աշխարհի առաջնության ընտրական փուլը՝ Երևանում հանդիպելով Հայաստանի հավաքականին։ Հայաստանում ֆուտբոլը աստիճանաբար զարգանում է, հատկապես մայրաքաղաքի մոտ գտնվող «Նոա» ակումբում։ Ընդամենը ութ տարուց փոքր-ինչ ավելի պատմություն ունեցող ակումբը նախորդ մրցաշրջանում դարձավ Հայաստանի չեմպիոն և գավաթակիր։ Այդ հաջողություններին իրենց ներդրումն ունեցան չորս պորտուգալացի խաղացողներ՝ Գոնսալու Սիլվան, Գոնսալու Գրեգորիուն, Բրունու Ալմեյդան և Էլդեր Ֆերեյրան։

Հայաստան տեղափոխվելու մասին

Ֆերեյրան պատմել է, թե ինչպես է հայտնվել Հայաստանում։ Մինչ այդ նա խաղացել է Կիպրոսի «Անորտոսիսում»․

«Ակումբից հեռացա ավելի վաղ՝ ֆինանսական խնդիրների պատճառով։ Արձակուրդում էի, երբ իմ նախկին մարզիչը «Վիտորիա Գիմարայնշից» կապ հաստատեց ինձ հետ և տեղեկացրեց, որ «Նոան» հետաքրքրված է ինձանով։ Սկզբում այդ գաղափարը գրավիչ չէր։ Սակայն գործակալս կապվեց ակումբի հետ, և նրանք ներկայացրին իրենց նախագիծն ու պայմանները։ Բանակցություններից հետո համաձայնության եկանք», — նշել է նա։

Սկզբում Ֆերեյրան ցանկանում էր մնալ Կիպրոսում․

«Կիպրոսում խաղալն ինձ դուր էր գալիս։ Այնտեղ մրցունակ առաջնություն է։ Երբ առաջացավ «Նոայի» տարբերակը, այն իմ առաջին ընտրությունը չէր։ Նախկինում այցելել էի Հայաստան՝ ընկերոջս՝ Ադրիանու Կաշտանյեյրայի հետ, որը խաղում էր «Արարատում», և ծանոթ էի առաջնությանը։ Սկզբում ցանկանում էի ավելի մոտ մնալ Պորտուգալիային, բայց «Նոայի» նախագիծը գրավիչ էր, և ես համաձայնվեցի», — ավելացրել է Ֆերեյրան։

Հարձակվողը գոլ է խփել «Օլիմպիա Լյուբլյանայի» դեմ՝ օգնելով «Նոային» դուրս գալ Կոնֆերենցիաների լիգայի խմբային փուլ։

Եվրոպական փորձառություն

«Նոան» նախորդ տարի մասնակցել է Կոնֆերենցիաների լիգային, որտեղ հանդիպել է «Չելսիին»։ 0:8 հաշվով պարտությունը չի խանգարել արժեքավոր փորձ ձեռք բերել․

«Այդ հանդիպումը հիանալի փորձառություն էր։ Իհարկե, մակարդակների տարբերությունը զգացվում էր։ «Չելսին» աշխարհի լավագույն թիմերից է, որը հաղթել է Կոնֆերենցիաների լիգան և Աշխարհի ակումբային առաջնությունը։ Նման խաղերը միշտ արժեքավոր են և հիշվում են», — նշել է Ֆերեյրան։

Կյանքը Հայաստանում

Հարցին, թե ինչպիսին է Հայաստանը, որտեղ շուտով խաղալու է Պորտուգալիան, Ֆերեյրան պատասխանել է․

«Երևանը գեղեցիկ և աշխույժ մայրաքաղաք է։ Այստեղ հարմար է ապրել։ Միակ տարբերությունը ձմռան ցուրտն ու առատ ձյունն է, որին մենք սովոր չենք։ Երկիրը բավականին անվտանգ է, և կյանքն այստեղ հարմարավետ է։ Իհարկե, Պորտուգալիայի հետ ոչինչ չի համեմատվում։ Ես վերադառնալու առաջարկներ եմ ստացել, բայց ֆինանսական առումով «Նոայի» պայմաններն ավելի գրավիչ էին», — ասել է նա։

Ֆերեյրան, որը նախորդ մրցաշրջանում խփել է 13 գոլ, կարծես երկար կմնա Հայաստանում․

«Վերջերս նոր պայմանագիր եմ կնքել ևս մեկ տարով։ Այս և հաջորդ մրցաշրջանում պայմանագրով կապված եմ «Նոային»։ Իմ նպատակն է առավելագույն ներդրում ունենալ թիմի հաջողությունների համար», — նշել է նա։

Պորտուգալիայի հավաքականը և Կրիշտիանու Ռոնալդու

Հայաստան-Պորտուգալիա հանդիպման մասին խոսելով՝ Ֆերեյրան նշել է․

«Հաճելի է, երբ Պորտուգալիայի հավաքականը գալիս է այստեղ, և մենք կարող ենք նրանց խաղը տեսնել խաղադաշտում։ Հայաստանի հավաքականի համար էլ կարևոր է մրցել աշխարհի լավագույն թիմերից մեկի դեմ։ Պորտուգալիան ներկայումս աշխարհի առաջատար թիմերից է, և սա մեծ փորձ է հայ ֆուտբոլիստների համար»։

Հարցին, թե արդյոք Պորտուգալիան կարող է հաղթել 2026 թվականի աշխարհի առաջնությունում, Ֆերեյրան վստահորեն պատասխանել է․ «Անկասկած»։

Կրիշտիանու Ռոնալդուի մասին խոսելով՝ նա ասել է․

«Ռոնալդուն օրինակ է բոլոր երեխաների համար՝ անկախ նրանից՝ ֆուտբոլ են խաղում, թե ոչ։ Հայաստանում շատերը կրում են նրա մարզաշապիկը։ Հնարավոր է՝ հանդիսատեսի մի մասն աջակցի հենց նրան, քանի որ նա համաշխարհային ճանաչում ունի։ Նույնիսկ եթե հայերը ցանկանան, որ իրենց հավաքականը հաղթի, Ռոնալդուի հանդեպ հատուկ վերաբերմունք կլինի։ Բոլորը սպասում են, որ նա գոլ խփի, և ստադիոնը միասին կտոնի»։

Ֆերեյրայի կանխատեսումը խաղի մասին միանշանակ է․

«Չգիտեմ, թե ինչ հաշվով կավարտվի խաղը, բայց թիմակիցներիս հետ խաղադրույքներ եմ կատարել՝ վստահ լինելով, որ Պորտուգալիան կհաղթի։ Ֆուտբոլում միշտ անորոշություն կա, բայց Պորտուգալիան զգալիորեն ավելի ուժեղ է։ Սպասում եմ բազմաթիվ գոլերի և առնվազն մեկ գոլի ‘Pai Grande’ [«Մեծ Հորից»]՝ Կրիշտիանու Ռոնալդուից»։