«Բարսելոնայի» մամուլի ծառայությունը պաշտոնապես հայտարարել է, որ թիմի գերմանացի դարպասապահ Մարկ-Անդրե տեր Շտեգենը զրկվել է ավագի թևկապից։
«Կապտանռնագույնների» նոր ավագն է դարձել ուրուգվայցի պաշտպան Ռոնալդ Արաուխոն։
«Բարսելոնան հայտարարում է, որ ֆուտբոլիստ Մարկ-Անդրե տեր Շտեգենի դեմ հարուցված կարգապահական վարույթից հետո, և մինչև այս հարցի վերջնական լուծումը, ակումբը մարզական ղեկավարության և մարզչական շտաբի հետ փոխադարձ համաձայնությամբ որոշել է ժամանակավորապես կասեցնել նրան առաջին թիմի ավագի պաշտոնից։
Այս ընթացքում թիմի առաջին ավագի պարտականությունները կկատարի ներկայիս փոխավագ Ռոնալդ Արաուխոն»,- նշվում է «Բարսելոնայի» մամուլի ծառայության հայտարարությունում։
Հիշեցնենք, որ ավելի վաղ գերմանացի դարպասապահը հրաժարվել էր ստորագրել Լա Լիգայի բժշկական հանձնաժողովին ուղղված իր վնասվածքի վերաբերյալ զեկույցը, որը ակումբին թույլ կտար գրանցել թիմի նորեկ Ժոան Գարսիային։
