Եթե «Բարսելոնան» մինչև սեպտեմբերի 13-14-ը չստանա «Սպոթիֆայ Կամպ Նոու» մարզադաշտն օգտագործելու անհրաժեշտ թույլտվությունները, Լա Լիգայի նոր մրցաշրջանը կարող է սկսել «Յոհան Կրույֆ» մարզադաշտում։ «Օլիմպիկ Լյուիս» մարզադաշտն այդ օրերին հասանելի չի լինի, քանի որ սեպտեմբերի 12-ին այնտեղ կկայանա Փոսթ Մելոնի համերգը։ Այս մասին տեղեկացնում է Sport.es-ը։
Այդ դեպքում խաղը կանցկացվի «Յոհան Կրույֆ» մարզադաշտում, որը տեղավորում է ընդամենը 6000 հանդիսատես, ինչը ակումբի համար կնշանակի զգալի ֆինանսական կորուստներ։
Ակումբն այժմ դիտարկում է «Վալենսիայի» հետ հանդիպումն անցկացնելու հնարավորությունը «Կամպ Նոուում»՝ մոտ 30,000 հանդիսատեսով, ինչպես նախատեսված էր «Ժոան Գամպեր» գավաթի խաղի համար։ Այդուհանդերձ, ակումբի հիմնական նպատակը Չեմպիոնների լիգայի խմբային փուլի մեկնարկից առաջ բոլոր անհրաժեշտ թույլտվությունները ստանալն է, քանի որ ՈւԵՖԱ-ն պահանջում է այդ փուլի խաղերն անցկացնել մեկ մարզադաշտում։
Եթե թույլտվությունները ստանալ չհաջողվի, «Բարսելոնան» Չեմպիոնների լիգայի հանդիպումները կրկին կանցկացնի Մոնժուիկում։ Ակումբը հույս ունի, որ «Վալենսիայի» հետ խաղը կկայանա «Կամպ Նոուում»՝ աստիճանաբար ավելացնելով մարզադաշտի հասանելի տարածքների թիվը։
