«Բենֆիկան» և «Բոկա Խունիորսը» 2:2 հաշվով ոչ-ոքի ավարտեցին Աշխարհի ակումբային առաջնության 2025 թվականի խմբային փուլի առաջին տուրի հանդիպումը: Խաղը տեղի ունեցավ ԱՄՆ-ի Մայամի քաղաքի «Հարդ Ռոք» մարզադաշտում:
Արգենտինական ակումբն առաջ անցավ խաղի սկզբում. 6 րոպեի տարբերությամբ գոլեր խփեցին Միգել Մերենտիելը և Ռոդրիգո Բատալյան: Սակայն պորտուգալական թիմը կարողացավ հավասարեցնել հաշիվը: Անխել Դի Մարիան իրացրեց 11-մետրանոցը, իսկ Նիկոլաս Օտամենդին, չնայած թիմի փոքրաթիվ կազմին, հաշիվը դարձրեց 2:2:
72-րդ րոպեին «Բենֆիկան» մնաց 10 խաղացողով. իտալացի հարձակվող Անդրեա Բելոտին ստացավ կարմիր քարտ: 88-րդ րոպեին կարմիր քարտ ստացավ նաև «Բոկա Խունիորսի» պաշտպան Խորխե Նիկոլաս Ֆիգալը:
Խմբում երկու թիմերն էլ ունեն 1-ական միավոր: Հունիսի 20-ին «Բենֆիկան» կմրցի «Օքլենդ Սիթիի», իսկ «Բոկա Խունիորսը»՝ հունիսի 21-ին «Բավարիայի» հետ:
Խաղից հետո ֆուտբոլիստները մեկնաբանել են հանդիպումը: «Բենֆիկայի» կիսապաշտպան Անխել Դի Մարիան անդրադարձել է «Բոկայի» երկրպագուների սուլոցներին.
«Դա նորմալ է: Ի՞նչ անել, եթե նրանք նյարդայնանում են: Ես խաղում եմ մրցակից թիմում և գոլ խփեցի նրանց դարպասը: Դա տրամաբանական է: Սա ֆուտբոլ է, և մենք բոլորս դա հասկանում ենք», – ասել է Դի Մարիան TyC Sports-ին:
Թիմակից Նիկոլաս Օտամենդին, որը նույնպես խաղացել է Արգենտինայում, նշել է.
«Սուլոցներն ուղեկցում էին ինձ ամբողջ խաղի ընթացքում: Դա սովորական է Արգենտինայում: Ես գոլ խփեցի և շատ ուրախ էի: Բարձր գոռացի, ինչպես միշտ, երբ գոլ եմ խփում»:
«Բոկա Խունիորսի» կիսապաշտպան Ռոդրիգո Բատալյան խոստովանել է իր հիասթափությունը.
«Մնաց դառը զգացողություն: Մենք վստահ էինք, որ կհաղթենք: Պայքարեցինք, վազեցինք, խաղացինք այնպես, ինչպես պետք է: Բայց չօգտագործեցինք մեր առավելությունը, և նրանք հավասարեցրին հաշիվը՝ չնայած փոքրաթիվ կազմին։ Այժմ պետք է կենտրոնանանք հաջորդ խաղի վրա», – ասել է Բատալյան ՖԻՖԱ-ի մամուլի ծառայությանը:
Օրվա մյուս խաղում բրազիլական «Ֆլամենգոն» Աշխարհի ակումբային առաջնության 2025 թվականի խմբային փուղի առաջին տուրում հաղթեց թունիսյան «Էսպերանսին»:
D խմբի հանդիպումը տեղի ունեցավ Ֆիլադելֆիայում և ավարտվեց 2:0 հաշվով: Գոլերը խփեցին Ջորջիան Դե Արասկաետան և Լուիս Արաուժոն:
Հաջորդ տուրում «Ֆլամենգոն» կմրցի «Չելսիի», իսկ «Էսպերանսը»՝ «Լոս Անջելեսի» հետ:
