Մադրիդի «Ռեալը» կարող է նոր առաջարկ անել «Լիվերպուլին» աջ պաշտպան Տրենտ Ալեքսանդր-Առնոլդի համար։ Այս մասին հայտնում է իսպանական հայտնի Marca առցանց հրատարակությունը։
Աղբյուրի համաձայն՝ «սերուցքայինները» կկապվեն «Լիվերպուլի» հետ, հենց որ մերսիսայդցիները պատրաստ լինեն բաց թողնել խաղացողին ձմեռային տրանսֆերային պատուհանի ժամանակ։ Ավելի վաղ տեղեկություններ էին հայտնվել, որ «կարմիրները» հունվարին չեն ցանկանում բաժանվել պաշտպանից։ Վատագույն դեպքում մերսիսայդցիները կցանկանային նրան պահել մինչև ամառ:
Ավելի վաղ ԶԼՄ-ները հայտնել էին, որ «Լիվերպուլը» մերժել է «Ռեալի»՝ հունվարին 15 միլիոն եվրոյի դիմաց Տրենտ Ալեքսանդր-Առնոլդին ձեռք բերելու առաջարկը:
Հիշեցնենք, որ Տրենտի պայմանագիրը «Լիվերպուլի» հետ ավարտվում է 2025 թվականի ամռանը։ Ընթացիկ մրցաշրջանում 26-ամյա պաշտպանը «կարմիրների» կազմում բոլոր մրցաշարերում անցկացրել է 23 հանդիպում՝ դառնալով մեկ գոլի և 5 գոլային փոխանցման հեղինակ:
