Բրիտանացի գրող Ջոան Ռոուլինգը քննադատել է BBC-ին Women’s Footballer of the Year մրցանակի դափնեկիր ճանաչված ֆուտբոլիստուհու ընտրության համար:
Տարվա լավագույն ֆուտբոլիստուհի է ճանաչվել 24-ամյա զամբիացի Բարբրա Բանդան, ում մոտ վաղուց հայտնաբերվել է բարձր տեստոստերոնի մակարդակ։
Ի՞նչ ասաց Ռոուլինգը
Ռոուլինգը սոցիալական ցանցերում արձագանքել է The Telegraph-ի սպորտային բաժնի ղեկավար Օլիվեր Բրաունի գրառմանը: Վերջինս նույնպես չէր հասկանում, թե ինչպես մրցանակը տրվեց ֆուտբոլիստուհուն, որին վերջերս որակազրկել էին:
«Հավանաբար, BBC-ն որոշել է այս կերպ խնայել ժամանակը՝ փոխարենը դուռ առ դուռ շրջելու և կանանց երեսին թքելու», – գրել է Ռոուլինգը:
Ռոուլինգի այսպիսի արձագանքը զարմանալի չէ. նախկինում նա բազմիցս քննադատել է տրանսգենդերներին և պաշտպանել կենսաբանական կանանց իրավունքները: Մասնավորապես, գրողը քննադատել էր բռնցքամարտիկ Իման Հելիֆի մասնակցությունը Օլիմպիական խաղերին, ինչի համար ալժիրուհին անգամ դատի էր տվել նրան։
Բրիտանացի լողորդուհի Շերոն Դևիսը նույնպես համակարծիք էր Ռոուլինգի հետ՝ հայտարարելով, որ BBC-ի աջակցությունն այս իրավիճակում «տխուր է և անարդար»:
«Ես այնքան հիասթափված և վրդովված եմ, որ նրանք ակտիվորեն աջակցում են այս անարդարությանը», – ասել է Դևիսը:
Բանդան որակազրկվել էր Աֆրիկայի գավաթից
Բարբրա Բանդայի շուրջ սկանդալը ծագել էր 2022 թվականին, երբ նրան որակազրկեցին Աֆրիկայի գավաթից՝ տեստոստերոնի բարձր մակարդակի պատճառով։
«Ցավոք, նա չէր համապատասխանում Աֆրիկայի ֆուտբոլի կոնֆեդերացիայի սահմանած չափանիշներին», – ասել էր Զամբիայի ֆուտբոլի ֆեդերացիայի նախագահ Էնդրյու Կամանգան։
Ավելի վաղ Բանդային առաջարկել էին բուժման կուրս անցնել, բայց մարզուհին հրաժարվել էր՝ վախենալով կողմնակի ազդեցություններից: Նման առաջարկ ստացել էին նաև նրա երկու թիմակիցները՝ Ռեյչել Կունդանանջին և Ռեյչել Նակուլան։
Չնայած հորմոնների հետ կապված խնդիրներին, Բարբրա Բանդան հանդես է եկել Տոկիոյի և Փարիզի Օլիմպիական խաղերում, ինչպես նաև վերջին աշխարհի առաջնությունում, քանի որ ՄՕԿ-ի և ՖԻՖԱ-ի կանոնները ավելի մեղմ են, քան Աֆրիկայի գավաթին մասնակցության պահանջները։
Ինչո՞ւ Բանդային տրվեց մրցանակը
Մարզուհին այս տարի փայլուն էր հանդես գալիս թե՛ ակումբային մակարդակում, թե՛ ազգային հավաքականում։ Ամռանը Բանդան Զամբիայի համար Փարիզի Օլիմպիական խաղերում խփեց չորս գոլ, իսկ երկու Օլիմպիադաներում՝ ընդհանուր 10 գոլով, դարձավ մրցաշարի պատմության լավագույն աֆրիկացի ռմբարկուն։
Ակումբային մակարդակում Բանդան խաղում է ԱՄՆ-ի «Օռլանդո Փրայդս» ակումբում։ Նախորդ մրցաշրջանում նա 13 գոլ խփեց կանոնավոր առաջնությունում և ևս չորսը՝ փլեյ-օֆֆում, օգնելով թիմին առաջին անգամ նվաճել ազգային լիգայի գավաթը։
BBC-ի մրցանակակիրն ընտրվել է երկրպագուների համաշխարհային քվեարկությամբ, նախապես կազմված 5 թեկնածուների ցանկից։
Բանդայի արձագանքը
«Ես ցնցված և զարմացած եմ, որ այս մրցանակն ինձ տրվեց։ Իմ թիմակիցները շատ աշխատեցին, որ ես հասնեմ այստեղ և արժանանամ այս տիտղոսին։ Ես սիրում եմ գոլեր խփել. դա հեշտ չէր, բայց քրտնաջան աշխատանքն ու հետևողականությունն իրենց արդյունքը տվեցին։ Այն փաստը, որ ես դարձա այս մրցանակը ստացած երկրորդ աֆրիկուհին, շատ մեծ նվաճում է ինձ համար», – ասել է մարզուհին BBC-ին։
