«Բավարիայի» դարպասապահ Մանուել Նոյերը կիսվել է հարձակվող և թիմակից Թոմաս Մյուլերի մասին իր կարծիքով, որը երեկ՝ սեպտեմբերի 1-ին, գերազանցել է մյունխենյան ակումբի ռեկորդը Բունդեսլիգայի 2-րդ տուրի՝ «Ֆրայբուրգի» հետ խաղում (2:0):
«Ինչո՞վ է առանձնահատուկ Թոմասը. նրանով, որ նա կրում է «Բավարիայի» ԴՆԹ-ն։ Նա մի տղա է, ով միշտ ցանկանում է հաղթել: Չեմ կարծում, թե ես գիտեմ մեկ այլ ֆուտբոլիստի, ով այդքան հավակնոտ է, ինչպես նա կամ ով այդքան արագ է սովորում: Անկախ նրանից, թե ինչ խաղ են տալիս նրան, նա կարող է դա իրագործել աչքը թարթելու մեջ։ Թոմասը պարզապես հաղթող է: Մեզ նման խաղացողներ են պետք։
Խաղադաշտից դուրս մենք երկուսս էլ շատ ենք խոսում «Բավարիայի» համար կարևոր բաների մասին, մեզ հուզող բաների մասին։ Թոմասը շատ ազնիվ և շիտակ մարդ է։ Նրա բավարական մտածելակերպը համապատասխանում է իմ ռուրյան մտածելակերպին: Թոմասը դարաշրջան ստեղծեց «Բավարիայում». Մենք երկու անգամ հաղթեցինք Չեմպիոնների լիգան և անընդմեջ նվաճեցինք 11 լիգայի տիտղոս։ Առանց Թոմաս Մյուլերի, ֆուտբոլիստի նրա որակի և բնավորության, սրանից ոչ մեկը հնարավոր չէր լինի: Այդ պատճառով նա ինձ համար ամենաբարձր առաջնահերթությունն ունի ոչ միայն «Բավարիայում», այլ նաև Գերմանիայի հավաքականում, որի հետ միասին 2014 թվականին դարձանք աշխարհի չեմպիոն։ Դժվար թե գտնվեն այնպիսի խաղացողներ, ովքեր կարող են համեմատվել Թոմաս Մյուլերի հետ։
Շատ ուրախ եմ, որ Թոմասի հետ այսքան ժամանակ խաղացել եմ նույն թիմում։ Նա միշտ կատակում է և մեզ լավ տրամադրություն է ապահովում։ Կարծում եմ՝ նա այն խաղացողն է, ով անգիր գիտի ամենաշատ կատակները: Նա տարօրինակ տեսք ունի տոնակատարության որոշ լուսանկարներում և զվարճալի պարում է երեկույթներին: Ես այնքան շատ պահեր եմ ունեցել նրա հետ, որ սիրում եմ հիշել: Եվ ես կարծում եմ, որ դրանք էլ ավելի շատ կլինեն»,- Նոյերի խոսքերն է մեջբերում «Բավարիայի» մամուլի ծառայությունը։
Հիշեցնենք, որ Մյուլերն այս պահին ունի 710 հանդիպում։ Այս ցուցանիշով խաղացողը գերազանցել է «Բավարիայի» նախկին դարպասապահ Զեպ Մայերին։
