Մինչ ամբողջ աշխարհը պայքարում է կորոնավիրուսի դեմ, Խորվաթիայում մեկ այլ մեծ աղետ է տեղի ունեցել. մայրաքաղաք Զագրեբից ոչ հեռու մարտի 22-ին 5,3 մագնիտուդ ուժգնությամբ երկրաշարժ է գրանցվել՝ ամենաուժգինը վերջին 140 տարում:
Երկրաշարժը մեծ ավերածություններ է առաջացրել, փլատակների տակից փրկարարները հանել են 15-ամյա երեխայի դի: Միջազգային լրտատվամիջոցները հայտնում են, որ վնասվել է մոտ 60 շինություն, 30 ավտոմեքենա, խնդիրներ կան էլեկտրաէներգիայի և ինտերների հետ:
Դեռ երեկ երկրի իշխանությունները մարդկանց կոչ էին անում դուրս չգալ փողոց, իսկ այսօր արդեն խնդրում են տանը չմնալ (բայց իհարկե պահպանելով սոցիալական հեռավորությունը). հավանական է՝ ցնցումները կրկնվեն:
Զագրեբը սարսափելի տեսք ունի.
Ինտերների և էլեկտրաէներգիայի հետ կապված խնդիրներն ազդել են հիվանդանոցների վրա. կենսական շատ ապարատներ կապված են էներգիայի անխափան մատուցման հետ: Հատկապված վտանգավոր իրավիճակում են հայտնվել նորածինները՝ ծննդատներում:
Այս իրավիճակում օգնության են հասել Bad Blue Boys-ի՝ Զագրեբի «Դինամոյի» երկրպագուների շարժման տղաները: Նրանք՝ պաշտպանիչ դիմակներով, հավաքվել են ծննդատան մոտ, կանանց համար տաք հագուստ բերել և օգնել էվակուացնել նորածիններին ու նրանց մայրերին անվտանգ վայրերում:
FC Dinamo's soccer fans "Bad Blue Boys" are saveing newborn babies from hospital…#earthquake #Croatia#CroatiaEarthquake #Zagreb #zagrebearthquake #badblueboys
— Adriana Vukovich (@AdrianaVukovich) March 22, 2020
❤❤❤❤❤💪🇭🇷💪❤❤❤❤❤ pic.twitter.com/7HhBYddW2G
Զագրեբում աղետների դեմ պայքարին օգնում է ավելի քան 1000 երկրպագու. ամեն ինչ համաձայնեցված է տեղի իշխանությունների հետ, որոնք թույլ են տվել իրականացնել այս մարդասիրական ակցիաները:
BBB-ն, սակայն, այսքանով չի սահմանափակվել. նրանք զինվորականների հետ քանդել են արգելապատնեշները, իսկ դրանից մի քանի օր առաջ էլ դեղորայք և մքերքներ են հասցրել ծերերին, ովքեր կորոնավիրուսի պատճառով ռիսկային խմբում են հայտնվել:
Նշենք՝ երկրաշարժի պատճառով տուժել է նաև «Դինամոյի» տնային մարզադաշտը՝ լեգենդար «Մաքսիմիրը»: Ակումբը հայտնել է, որ վնասվել են հարավային և արևելյան տրիբունաները, կոտրվել են ապակիները, բետոնե կոնստրուկցիաները ևս ոչ մեծ վնասներ են կրել:
«Ես արթնացա վաղ առավոտյան առաջին ցնցման պատճառով, երկրորդ ցնցման ժամանակ արդեն ոտքի վրա էի,- պատմում է «Դինամոյի» բոսնիացի լեգեոներ Ամեր Գոյակը,— դա ինձ հիշեցնում էր հարազատ Սարաևոն՝ պատերազմի տարիներին: Հույս ունեի, որ այլևս երբեք նման բան չեմ տեսնի: Փառք Աստծո, իմ թիմակիցները լավ են, զոհեր չկան: Մեր երկրպագուները դուրս են եկել փողոց ու օգնում են մարդկանց: Նման պահերին հասկանում ես, որ մեր ակումբն իր շուրջը դրական էներգիա է տարածում: Դա ինձ երջանկացնում է: Զագրեբը կվերադառնա էլ ավելի գեղեցիկ ու լավը»:
Խորվաթ ֆուտբոլիստներն արդեն աջակցել են մայրաքաղաքին. Զագրեբի մասին սրտացավ գրառումներ են հայտնվել Մոդրիչի, Լովրենի, Մանջուկիչի, Կրամարիչի և մյուս աստղերի էջերում:
