Գերմանիայի հավաքականի նախկին մարզիչ Յոահիմ Լյովը կարծիք է հայտնել «Բավարիայում» հնարավոր աշխատանքի մասին։ Մյունխենցիների մարզիչ Թոմաս Տուխելը մրցաշրջանի ավարտից հետո կլքի ակումբը։
««Բավարիան» կարող է հետաքրքրված չլինել իմ ծառայություններով, ինձ նույնպես չի հետաքրքրում աշխատանքը։ Ես բավական երկար ժամանակ եղել եմ Գերմանիայի հավաքականում և միշտ ասում էի, որ ինձ համար այս երկրում այլ աշխատանքի մասին խոսք լինել չի կարող։ 17 տարի ես շրջել եմ ամբողջ այս երկրում, լավ գիտեմ բոլոր մարզադաշտերն ու ակումբները, ուստի մոտիվացիա չունեմ»,- մարզչի խոսքն է մեջբերել Bild-ը։
Տուխելը «Բավարիան» գլխավորել է 2023 թվականի մարտին։ Ակումբը չի երկարաձգի 50-ամյա գերմանացու պայմանագիրը, որը նախատեսված է մինչև 2024 թվականի հունիսի վերջը։
Մյունխենյան թիմը Բունդեսլիգայի առաջատար Լևերկուզենի «Բայերից» հետ է մնում 8 միավորով։
