Ամռանը Մյունխենի «Բավարիան» կարող է միանալ Լևերկուզենի «Բայերի» գլխավոր մարզիչ Խաբի Ալոնսոյի համար պայքարին, որի ծառայություններով հետաքրքրված է նաև «Լիվերպուլը»: Գերմանական թիմն այս տարբերակը կդիտարկի, եթե Թոմաս Տուխելը հեռանա ակումբից։ Այս մասին հայտնում է The Times-ի բրիտանական հրատարակությունը։
Աղբյուրի համաձայն՝ Չեմպիոնների լիգայի 1/8 եզրափակչի առաջին խաղում «Լացիոյից» կրած պարտությունից հետո (0:1) «Բավարիայի» ղեկավարությունը սկսել է ապագայում Տուխելին փոխարինելու հնարավոր թեկնածուների որոնումները։ Տարբերակներից մեկը Խաբի Ալոնսոն է, ով մարզում է Լևերկուզենի «Բայերը»: Բացի այդ, հավանականություն կա, որ Թոմասը կհեռացվի այս մրցաշրջանի կեսին:
Հիշեցնենք, որ ավելի վաղ հաղորդվում էր, որ «Բավարիայի» առաջիկա երեք հանդիպումները՝ «Բոխումի», «ՌԲ Լայպցիգի» և «Ֆրայբուրգի» հետ, որոշիչ են լինելու Տուխելի աշխատանքի ներքին գնահատականի համար։ 2023/2024 մրցաշրջանի Գերմանիայի առաջնությունում «Բավարիան» 50 միավորով զբաղեցնում է մրցաշարային աղյուսակի երկրորդ հորիզոնականը։ Թիմը հինգ միավորով է զիջում առաջատար «Բայերին»:
