Մայիսի 19-ին լեգենդար սուզալողորդ Շավարշ Կարապետյանը, որը 1976 թվականին փրկել է Երևանյան լիճն ընկած տրոլեյբուսի ուղևորներին, նշում է ծննդյան 70-րդ տարեդարձը։
Կարապետյանն աշխարհի 17-ակի, Եվրոպայի 13-ակի, ԽՍՀՄ 7-ակի չեմպիոն, աշխարհի 11-ակի ռեկորդակիր է։ Նա նաև սուզալողի ռուսական ասոցիացիայի պատվավոր նախագահն է։ Պարգևատրվել է «Պատվո նշան» շքանշանով։
1976 թ. սեպտեմբերի 16-ին Շավարշ Կարապետյանը միայնակ փրկել է Երևանյան լիճը ընկած տրոլեյբուսի 20 ուղևորների կյանքը։ Դեպքի պահին նա ավարտում էր ամենօրյա 20 կմ վազքը և, տեսնելով կատարվածը, անմիջապես նետվում է ջուրը՝ օգնություն ցույց տալու խեղդվող մարդկանց։ Նրան օգնել է եղբայրը՝ Կամո Կարապետյանը։ 10 մետր խորության վրա, զրոյական տեսանելիության պայմաններում, Շավարշ Կարապետյանը ոտքերով կոտրել է տրոլեյբուսի հետին ապակին և մեկ առ մեկ դուրս բերել 20 ուղևորի։ Մյուս ուղևորներին փրկել չի հաջողվել։
Իր անձնվեր քայլի հետևանքով Շավարշը վարակվել է թոքաբորբով, իսկ կոտրված ապակուց առաջացած վերքերը հանգեցրել են արյան վարակման։ Մի քանի շաբաթ նա ծանր վիճակում գտնվել է հիվանդանոցում, բայց, ի վերջո, կազդուրվել է։ Բժշկի խոսքերով՝ նա ապրել է միայն իր բացառիկ ֆիզիկական մարզվածության շնորհիվ։
Կարապետյանի վնասվածքները նրան թույլ չեն տվել շարունակել մարմնամարզիկի կարիերան, և նա ստիպված է եղել թողնել սպորտը։
Սա Կարապետյանի միակ հերոսական քայլը չէր։
1974 թվականի հունվարի 8-ին Շավարշ Կարապետյանը Ծաղկաձորի սպորտային բազայից ավտոբուսով վերադառնալիս է եղել Երևան։ Ավտոբուսում այդ պահին գտնվել են երեսունից ավելի ուղևորներ՝ ներառյալ մարզիկներ։ Վերելքի վրա վարորդը, նկատելով շարժիչի անսարքություն, ստիպված կանգնեցրել է մեքենան և դուրս եկել։ Նույն պահին անկառավարելի ավտոբուսը շարժվել է տեղից։ Վարորդի բացակայությունը առաջինը նկատել է Կարապետյանը, որն ամենից մոտն էր նստած վարորդին։ Փորձելով կանգնեցնել ավտոբուսը և կանխել դրա անկումը ձորի մեջ՝ Շավարշը արմունկով ջարդել է վարորդի խցիկի ապակյա պատը և կտրուկ ուղղել է ավտոբուսը դեպի սարը։
Ավելի ուշ այս իրավիճակի վերլուծության ընթացքում պարզվել է, որ այս որոշումը միակ ճիշտ ելքն էր վթարից խուսափելու համար։ Հենց այս դեպքից հետո Շավարշ Կարապետյանը, պատասխանելով այն հարցին, թե ինչպես նրան հաջողվեց կանխել ողբերգությունը, ասել է իր հայտնի խոսքերը.
-Ուղղակի ես ամենից մոտն էի։
1985 թվականի փետրվարի 15-ին էլ Կարապետյանն օգնել է մարդկանց փրկել Երևանի Կարեն Դեմիրճյանի անվան մարզահամերգային համալիրի հրդեհի ժամանակ։ Նա առաջիններից է հասել հրդեհի վայր և սկսել օգնել հրշեջներին։ Փրկարարական գործողությունների ընթացքում նա վնասվածքներ և այրվածքներ է ստացել։
Նշենք՝ 2014թ. Օլիմպիական խաղերի կրակի վազարշավի տասը ջահակիրներից մեկը Շավարշ Կարապետյանն էր։
