Հայաստանի ֆիզիկական կուլտուրայի և սպորտի պետական ինստիտուտը պարգևատրել է նախորդ տարում մարզական ձեռքբերումներով աչքի ընկած իր 10 լավագույն մարզիկ-ուսանողներին: Արդեն երկրորդ տարին է պարգևավճարները սահմանվում և հանձնվում են ինստիտուտի գործընկեր TotoGaming ընկերության կողմից։
Լավագույն տասնյակը գլխավորում էր ազատ ոճի ըմբշամարտի աշխարհի բրոնզե մեդալակիր, Եվրոպայի առաջնության չեմպիոն, Մ23 տարեկանների աշխարհի չեմպիոն Արսեն Հարությունյանը: Երկրորդ տեղում էր հունահռոմեական ոճի ըմբշամարտի ԱԱ բրոնզե մեդալակիր, Եվրոպայի չեմպիոն, Մ23 ԱԱ չեմպիոն Մալխաս Ամոյանը: Եռյակը եզրափակում էր ծանրամարտի աշխարհի առաջնության բրոնզե մեդալակիր, Եվրոպայի փոխչեմպիոն, Եվրոպայի ու Աշխարհի երիտասարդական առաջնության չեմպիոն Վարազդատ Լալայանը:
Տասնյակում ընգրկվել էին նաև հրաձգության Եվրոպայի չեմպիոն Գոհար Հարությունյանը, բռնցքամարտի Եվրոպայի փոխչեմպիոն Արթուր Բազեյանը, բռնցքամարտի Եվրոպայի բրոնզե մեդալակիր Սոնա Հարությունյանը, ըմբշամարտի Մ23 տարեկանների աշխարհի փոխչեմպիոն Գևորգ Թորոսյանը, ըմշամարտի Մ23 տարեկանների աշխարհի առաջնության բրոնզե մեդալակիր, Մ23 տարեկանների Եվրոպայի փոխչեմպիոն Հրաչյա Պողոսյանն ու պարա սեղանի թենիսի Եվրոպական համալսարանական խաղերի բրոնզե մեդալակիր Գևորգ Բեգլարյանը:
Առաջին տեղը գրաված մարզիկը ստացել է 750 հազար, երկրորդ տեղը՝ 500 հազար, իսկ երրորդ տեղը՝ 250 հազար դրամ պարգևատրում: Մնացած մարզիկները պարգևատրվել են 100 հազարական դրամներով:
Լավագույն տասնյակը կազմել էր Ֆիզիկական կուլտուրայի և սպորտի պետական ինստիտուտի հանձնաժողովը, որը ձևավորվել է ռեկտորի հրամանով, և որում ընգրկված են եղել մարզական ակումբների ներկայացուցիչները, թողարկող ամբիոնի վարիչներն ու դեկանները:
«Ավանդույթի համաձայն լավագույն մարզիկ ուսանողների պարգևավճարները սահմանել է ֆիզկուլտ ինստիտուտի գործընկեր TotoGaming ընկերությունը: Մարզիկների կազմը բավականին ներկայացուցչական էր: Հանրապետության 10 լավագույն մարզիկների գրեթե կեսը մեր ինստիտուտի 10 լավագույնների կազմում էին: Մեզ մոտ հիմնականում հաշվի է առնվել ամենաբարձր տարիքային խմբի արդյունքները: Հանձնաժողովի աշխատանքն այստեղ շատ կարևոր է: Օրինակ՝ 10-րդ մրցանակակիրը՝ Գևորգը, Եվրոպական ուսանողական խաղերի բրոնզե մեդալակիր է, որը զուտ սպորտային առումով ավելի թույլ է, քան ենթադրենք երիտասարդական ԵԱ-ն: Բայց, հաշվի առնելով հաշմանդամություն ուենցող անձանց ներգրավվածությունը սպորտում, հանձնաժողովը որոշել է, որ Գևորգը լինի տասնյակում: Բացի այդ, Մալխաս Ամոյանի ու Արսեն Հարությունյանի արդյունքները հավասար էին, և այստեղ հաշվի են առնվել նրանց միջին որակական գնահատականը, ուսման առաջադիմությունը»,-ասաց ինստիտուտի ռեկտոր Դավիթ Խիթարյանը:
Մրցանակը ստանալուց հետո Եվրոպայի չեմպիոն Արսեն Հարությունյանը շնորհակալություն հայտնեց հարազատ բուհի ղեկավարությանն ու հովանավոր ընկերությանը:
Հունահռոմեական ոճի ըմբշամարտի ԱԱ բրոնզե մեդալակիր, Եվրոպայի չեմպիոն, Մ23 ԱԱ չեմպիոն Մալխաս Ամոյանը մեզ հետ զրույցում նշեց, որ մարզական արդյունքների նման գնահատականը հարազատ բուհից յուրահատուկ զգացողություն է առաջացնում:
«Առաջին հերթին շատ ուրախ եմ, որ կարողացա ընդգրկվել լավագույնների ցանկում: Այս վերաբերմունքը մեզ ավելի է պարտավորեցնում, որ կարողանանք գերազանցել մեր արդյունքները: Մարզիկների համար շատ կարևոր է նման վերաբերմունքը»,-ասաց Մալխաս Ամոյանը:
Միջոցառմանը ներկա էր նաև Երևանի «Արարատի» կիսապաշտպան և հովանավոր ընկերության սպորտի դեսպան Դավիթ Մանոյանը:
«Լինելով սպորտի դեսպան կարևորում եմ նման միջոցառումների անցկացումը։ Նախորդ տարի մենք երկու անվանական կրթաթոշակ սահմանեցինք ֆիզկուլտ ինտիտուտի 2 ուսանողի: Այս միջոցառումն էլ շատ կարևոր է Հայաստանում սպորտը խթանելու և մարզիկների հաջողություններին գնահատական տալու համար: Մարզիկները պետք է մոտիվացիա ունենան է’լ ավելի մեծ նվաճումների հասնելու»,-ասաց Մանոյանը:
Լուսանկարները՝ ստորև․
GALLERY
