Ֆուտբոլային սկաուտ․ Պորտուգալիան՝ ցատկահարթակ դեպի մեծ ֆուտբոլ

Պորտուգալիայի առաջնության ակումբները վերջին տասնամյակում աչքի են ընկնում բավականին մեծ տրանսֆերային դրական բալանսով։ Շատ ֆուտբոլիստներ՝ խաղալով պորտուգալական գրանդներում (և ոչ միայն գրանդներում), այնուհետև տեղափոխվում են թոփ-5 առաջնություններ։ Այդպիսով, Պորտուգալիայի առաջնությունը հանդիսանում է շատերի համար այսպես ասած ցատկահարթակ՝ դեպի մեծ ֆուտբոլ։

ArmSport․am-ը նախորդ անգամ անդրադարձել էր Բելգիայի առաջնությանը, որն ավանդաբար հանդիսանում է Եվրոպայի գլխավոր ֆուտբոլային դարբնոցներից մեկը։ Շարունակում ենք Ձեզ ծանոթացնել այս անգամ Պորտուգալիայի առաջնության ամենահեռանկարային ներկայացուցիչների հետ։

Անդերսոն և Տոնի Մարտինես

«Ֆամալիկաոն» իսկական իրարանցում առաջացրեց այս մրցաշրջանում։ Համեստ ակումբը, որը վերջերս գնել է Պորտուգալիայի ամենահարուստ գործարարներից մեկը, մեծ ամբիցիաներ ունի և փորձելու է առաջիկա մի քանի տարիների ընթացքում ամրապնդվել եվրագավաթային գոտում։ Եվ Անդերսոնը արդեն իսկ իր լուման ներդրել է Բրագայի արվարձանը հանդիսացող փոքրիկ քաղաքի ակումբի հաջողությունների մեջ։ Նա արդեն երրորդ մրցաշրջանն է անցկացնում պորտուգալական ակումբում՝ նախորդ տարի օգնելով թիմին դուրս գալ պորտուգալական էլիտա։ Բրազիլացի հարձակվողն այս մրցաշրջանում արդեն աչքի է ընկել 7 խփած գնդակներով։

Նույնքան անգամ աչքի է ընկել նաև իսպանացի հաձակվող Տոնի Մարտինեսը։ «Վալենսիայի» սանը ժամանակին բավականին հեռանկարային ֆուտբոլիստ էր համարվում և նրան երեք տարի առաջ իսպանական ակումբից ձեռք բերեց «Վեսթ Հեմը»՝ ուղարկելով երիտասարդ իսպանացուն վարձավճարով գործուղման իսպանական ցածր դիվիզիոնների ակումբներ։ Նրա մասին կարծես թե բոլորը արդեն մոռացել էին, սակայն այս մրցաշրջանից առաջ «Ֆամալիկաոն» անվճար ձեռք բերեց Տոնիին, և նա կրկին անգամ լսեցնել է տալիս իր մասին։ Նա դեռ 22 տարեկան է, և միգուցե շուտով մենք նրան կտեսնենք արդեն Լա Լիգայում։

Անդրե Հորտա

🇵🇹 Պորտուգալիա
«Բրագա»
23 տարեկան

Վերջերս «Բարսելոնան» ձեռք բերեց «Բրագայի» 20-ամյա հարձակվող Տրինկաոյին, ով շատ մասնագետների կարծիքով պորտուգալական ֆուտբոլի ապագա աստղն է։ Սակայն այս մրցաշրջանում թիմի հաջողություններում իր մեծ ներդրումն ունի նաև կիսապաշտպան Անդրե Հորտան։ Ինչպես մեր նախորդ հերոսը՝ Տոնի Մարտինեսը, նա էլ ժամանակին հանդիսանում էր բավականին հեռանկարային ֆուտբոլիստ։ Կարիերան սկսելով «Վիտորիա Սետուբալում»՝ նա երկու տարի անց տեղափոխվեց «Բենֆիկա», որտեղ նա չկարողացավ ամրապնդվել հիմնական կազմում։ Այնուհետև նա ուժերը փորձեց «Բրագայում»․ այստեղ առաջին անգամից կրկին չստացվեց տեղ գտնել գլխավոր թիմում և նա տեղափոխվեց MLS: «Լոս Անջելեսում» կրկին ամեն ինչ մշուշոտ էր․ երկու անհաջող մրցաշրջան և վերադարձ հայրենիք։ Սակայն «Բրագայի» կողմից տրված երկրորդ հնարավորությունից Անդրեն այս անգամ օգտվեց հաջողությամբ։ Ներկայումս նա թիմի հիմնական կազմի խաղացող է և դարձել է իսկական առաջատար։ Հնարավոր է, որ նույնիսկ շուտով նա թակի նաև հավաքականի դռները։

Լուիս Դիաս

🇨🇴 Կոլումբիա
«Պորտու»
23 տարեկան

Իսկ ահա կոլումբիացի կիսապաշտպանի մոտ ամեն ինչ հենց կարիերայի սկզբից գնում է շատ հաջող։ Նախորդ մրցաշրջանը նա հիանալի անցկացրեց հայրենքում՝ «Ժունիոր» ակումբում։ Նրա խաղը նկատել էին պորտուգալական գրանդի սկաուտները և այս մրցաշրջանից առաջ «Պորտուն» նրա համար վճարեց 8,5 մլն եվրո՝ ստանալով բավականին տաղանդավոր և հեռանկարային ֆուտբոլիստի։ Կոլուբիայի հավաքականի ֆուտբոլիստն արդեն իսկ առաջին մրցաշրջանում դարձել է «Պորտուի» առանցքային և ամենաարդյունավետ խաղացողներից մեկը․ 29 խաղ, 9 գոլ բոլոր մրցաշարերում․․․ վատ չէ, համաձայնվեք։

Կառլոս Վինիցիուս

🇧🇷 Բրազիլիա
«Բենֆիկա»
24 տարեկան

Երբ «Բենֆիկան» նախորդ ամռանը 17 մլն եվրո վճարեց «Նապոլիին» բարձրահասակ հարձակվողի համար, շատերի մոտ դա զարմանք առաջացրեց․ ինչո՞ւ այդքան գումար վճարել բրազիլացի հարձակվողի համար, ով ընդամենը 2 գոլ էր խփել «Մոնակոյի» կազմում նախորդ մրցաշրջանում (բրազիլացին այդպես էլ երբեք հանդես չեկավ «Նապոլիի» կազմում՝ վարձավճարով խաղալով «Ռիո Ավեում» և «Մոնակոյում»)։ Սակայն, ինչպես այժմ տեսնում ենք, Վինիցիուսի տրանսֆերը երևի թե լավագույնն է պորտուգալական լիգայի այս մրցաշրջանում։ 27 խաղ, 15 գոլ բոլոր մրցաշարերում, և այս ցուցանիշը դեռ մրցաշրջանի կեսում։ Այս տեմպերով նրան շուտով կարող ենք տեսնել որևէ գրանդ ակումբում, չէ՞ որ նա ընդամենը 24 տարեկան է և նրա մոտ դեռ ամեն ինչ առջևում է․․․

Վար Բաբայան

Շարքի նախորդ մասերը

Բելգիան շարունակում է մնալ ապագա աստղերի դարբնոց (Մաս 2)

Բելգիան շարունակում է մնալ ապագա աստղերի դարբնոց (Մաս 1)

Սամուրայների նոր սերունդը Եվրոպայում

Բրազիլիայի առաջնության ամենահեռանկարային ֆուտբոլիստները (Մաս 2)

Բրազիլիայի առաջնության ամենահեռանկարային ֆուտբոլիստները (Մաս 1)

MLS-ի 7 ֆուտբոլիստներ, ովքեր կարող են փայլել Հին աշխարհում

Նոր անուններ Արգենտինայից