«Լոկոմոտիվը» ֆուտբոլային ակումբը դիմել է Մոսկվայի Արբիտրաժային դատարան` հայց ներկայացնելով թիմի նախկին գործադիր տնօրեն Իլյա Գերկուսի դեմ: Դատական հայցով ակումբը 144.7 մլն ռուբլի է պահանջում Գերկուսից:
Այս մասին հայտնում է Коммерсантъ-ը:
Գերկուսը 2016-19 թթ. է զբաղեցրել «Լոկոմոտիվի» գործադիր տնօրենի պաշտոնը: 2018 թվականին ակումբը 14 տարվա մեջ առաջին անգամ հաղթել է Ռուսաստանի առաջնությունում:
«Դեռ նախորդ տարվա մարտին, խոսելով ակումբի ֆինանսական աուդիտի արդյունքների մասին, Դուք հայտարարեցիք, որ մտադիր եք լուրջ զրույց ունենալ նախկին գործադիր տնօրենի` Իլյա Գերկուսի հետ: Այն կայացա՞վ»,- հարցրել է լրագրողը «Լոկոմոտիվի» ներկայիս գործադիր տնօրեն Վասիլի Կիկնաձեին.
«Մտքերի փոխանակումը կայացել է փաստաբանների միջոցով` գրավոր կերպով: Մենք չեկանք ընդհանուր հայտարարի: Կարծում եմ`խոսակցությունը դեռ կշարունակվի: Ես ունեմ աուդիտի պաշտոնական տվյալները ու դրա հիման վրա առաջացած հարցերը: Որոշակի գործընթանցներ կիրականացվեն, բայց դա ավելի շատ փաստաբանների ու աուդիտորների գործն է»,- ասել է Կիկնաձեն:
