ՀՖՖ-ն հայտարարել է 2019 թվականի լավագույն ֆուտբոլիստի և մարզչի քվեարկության անցկացման մասին:
Նշված ԶԼՄ-ները, ինչպես նաև ակումբները (ակումբի նախագահ, գլխավոր մարզիչ և ավագ) կազմելու են լավագույն եռյակները ֆուտբոլիստների և մարզիչների հավակնորդների ցանկերից:
ArmSport-ը վերջին տասնամյակում ուշադրությամբ հետևում է զարգացող իրադարձություններին, փոփոխություններին և սպասվող մանրամասներին:
Վերջին տարիներին լավագույն ֆուտբոլիստի և մարզչի քվեարկությունները կազմակերպվում էին բավականին տարօրինակ: Ակումբները ներկայացնում էին լավագույն ֆուտբոլիստի հավակնորդների 5 թեկնածուներ, ընդհանուր ցանկում ավելացվում էին Հայաստանի հավաքականում և երիտասարդական ընտրանում հանդես եկող ֆուտբոլիստները: «Ունենում էինք պատկեր, երբ ցանկում լինում էին 80-ից ավելի, անգամ մինչև 100 ֆուտբոլիստներ»,- ArmSport-ի հետ զրույցում նշում է ՀՖՖ լրատվության բաժնի ղեկավար Հայկ Կարապետյանը:
«Ինձ թվում է՝ սա նորմալ չէ և որևէ երկրում ընդունված պրակտիկա չէ: Լինում էր նաև սուբյեկտիվ մոտեցման գործոնը. ակումբները ներկայացնում էին՝ ըստ իրենց ցանկության: Շատ հաճախ չէին ներկայացնում այն ֆուտբոլիստներին, ովքեր օրացույցային տարում իրապես ավելի արժանի էին: Փաստորեն, հավաքականի կազմում մի քանի գոլ խփած ֆուտբոլիստի հետ կարող էր պայքարել ակումբից պարզապես ներկայացված որևէ ֆուտբոլիստ կամ երիտասարդական ընտրանում մի քանի րոպե անցկացրած խաղացող»,- նկատում է Կարապետյանը:
Այս տարի ֆուտբոլիստների և մարզիչների հավակնորդների ցանկի կազմման ձևաչափը փոխվել է: Փոփոխությունները մեկնարկել են դեռևս նախորդ տարվանից: Առանցքային փոփոխությունն այն էր, որ ակումբները այլևս հավակնորդների ցանկի կազմմանը չեն մասնակցում՝ չներկայացնելով սեփական 5-յակները: Այս տարվա ընթացակարգի գլխավոր նորույթն այն է, որ լավագույն ֆուտբոլիստների և մարզիչների եռյակի քվերակությանը չեն մասնակցի ՀՖՖ Գործկոմի անդամները: Տարվա լավագույններին ընտրում են առանձնացված ԶԼՄ-ների ներկայացուցիչները, ակումբների նախագահները, գլխավոր մարզիչներն ու ավագները:
Այս տարվա լավագույն ֆուտբոլիստների և մարզիչների հավակնորդների ցանկը կազմվել է ՀՖՖ լրատվության բաժնի կողմից և համապատասխանեցվել մյուս բաժինների հետ: Հայկ Կարապետյանը մանրամասնում է.
«Որոշում կայացվեց սկզբունք ընտրվի հետևյալը. առանձնացվեն Ազգային հավաքականում, Հայաստանի առաջնությունում, ինչպես նաև եվրագավաթներում աչքի ընկած ֆուտբոլիստները: Ցանկը կազմվում է լրատվական բաժնի կողմից: Հաշվի ենք առնում անհատական ցուցանիշները, թիմային և անհատական նվաճումները: Այդ ամենը քննարկում ենք այն բաժինների հետ, որոնց ներկայացուցիչներն առնչություն ունեն հավաքականի և ներքին առաջնության հետ: Այսինքն, գործընթացին մասնակցում են ամենաքաջատեղյակները: Այնուհետև ևս մեկ անգամ քննարկել ենք ֆեդերացիայի՝ այդ հարցերով զբաղվող ղեկավարության հետ: Ցուցակը կազմվելուց հետո այն ներկայացնում ենք ակումբներին և ԶԼՄ-ներին, որոնք քվեարկելու իրավունք են ստացել»:
Տարիներ ի վեր ֆուտբոլային հանրության շրջանակում կա այն կարծիքը, որ անհրաժեշտ է առանձին մրցանակ սահմանել Հայաստանի Բարձրագույն խմբի առաջնության տարվա լավագույն ֆուտբոլիստի համար: Հայկական ֆուտբոլային ընտանիքն այս հարցում թերևս համակարծիք է:
Հասկանալի է, որ անհնար է առաջնության ֆուտբոլիստը մրցի թոփ առաջնություններում հանդես եկող խաղացողների հետ: Պարզ է, որ նախորդ առաջնության լավագույն ռմբարկու Ջոնել Դեսիրեն ինչքան էլ փայլուն մրցաշրջան անցկացնի, չի կարող համեմատվել Ա սերիայում հանդես եկող Հենրիխ Մխիթարյանի կամ Բունդեսլիգայի թիմում մրցելույթներ ունեցող Սարգիս Ադամյանի հետ: Այստեղ անհրաժեշտ է մրցակցային այլ դաշտ ստեղծել:
Այս տարվանից մեր ֆուտբոլում այս փոփոխությունն էլ կավելանա. Ընթացիկ մրցաշրջանի ավարտից հետո կընտրվի ԲԽ առաջնության՝ տարվա լավագույն ֆուտբոլիստը.
«Կանոնադրությունում արդեն ամրագրել ենք, որ ընթացիկ մրցաշրջանի ավարտից հետո անցկացվելու է առանձին քվեարկություն և մրցանակաբաշխություն՝ պարզելու ԲԽ առաջնության՝ տարվա լավագույն ֆուտբոլիստին»,- հայտնում է Հայկ Կարապետյանը:
Վերջին տարիներին ֆուտբոլասերների շրջանում բարձրացված հարցերից մեկն առնչվում է մարզչի ընտրությանը:
Այս թեմային անդրադառնալիս չենք կարող չհիշել 2017 թվականը. այդ տարի լավագույն մարզչի քվեարկություն պարզապես չանցկացվեց: ՀՖՖ նախկին նախագահ Ռուբեն Հայրապետյանն ասել էր.
«Այս տարի առանձին տարվա լավագույն մարզիչի քվեարկությունը չի եղել: Իրականում, միշտ էլ չի եղել: Ես գտնում եմ, որ մենք ճիշտ չենք արել ժամանակին, որ սահմանել ենք այդ մրցանակը: Հիմա որպեսզի խոսակցություններ չլինեն, թե ո՞վ պետք է քվեարկի, ով` ոչ, ով է արդար, ով՝ ոչ: Եթե հիշում եք, մենք ունեինք հայկական Մոուրինյու: Նա անցյալ տարի հայտարարեց, որ ինքն է լավագույնը, բայց սխալ ընտրություն է արվել: Նման բաներից խուսափելու համար, ավելի լավ է չանցկացնենք լավագույն մարզիչ քվեարկությունը: Հետագայում գուցե անհրաժեշտություն լինի, հանրության հետ նորից կքննարկենք, կմտցնենք»:
Սա, ըստ երևույթին, բացարձակ կողմնապահություն էր և անարդարություն: ՀՖՖ գործառույթը պետք է լինի, անկախ ամեն ինչից, ապահովել շարունակականությունը:
Հանրության շրջանում քննարկումներ են ընթանում նաև այն մասին, որ ցանկում ներգրավվեն նաև արտասահմանում գործունեություն ծավալող մարզիչները:
Հայկ Կարապետյանը բացառեց, որ երբևիցե կլինի նման որոշում.
«Չկա այդպիսի միտք: Գնահատականների առումով համաչափ և արդարացի չի ստացվում: ՀՖՖ գործառույթի մեջ չի մտնում հետևել այն մարզիչների աշխատանքին, ովքեր հայկական ֆուտբոլի հետ փաստացի կապ չունեն: Ֆուտբոլիստների պարագայում այլ է, նրանք խաղում են հավաքականում և մեր աչքի առաջ են: Ֆեդերացիան, մեծ հաշվով, կապ չունի այն ակումբների հետ, որոնք մարզում են հայազգի մասնագետներ»:
ArmSport-ը, որն ընդգրկված է քվերակության իրավունք ունեցող ԶԼՄ-ների ցանկում, ներքին քննարկումների արդյունքում է հանգել վերջնական կարծիքի: Եռյակների մեր ընտրությունը ներկայացնում է խմբագրության հավաքական տեսակետը:
Այս տարի ArmSport-ի եռյակներն այսպիսին են՝
Տարվա լավագույն ֆուտբոլիստ. 1.Սարգիս Ադամյան, 2.Կամո Հովհաննիսյան, 3.Հենրիխ Մխիթարյան
Տարվա լավագույն մարզիչ. 1.Վարդան Մինասյան, 2.Արմեն Գյուլբուդաղյանց, 3.Վարդան Բիչախչյան
Քվեարկության վերջնաժամկետն այսօր է՝ հունվարի 24-ին: ՀՖՖ-ն լրացուցիչ կտեղեկացնի մրցանակաբաշխության օրվա մասին:
Արման Առաքելյան
