Տոկիո-2020-ի ընթացքում հունահռոմեական ոճի 4 հայ ըմբիշից միակ մեդալը նվաճեց Օլիմպիական չեմպիոն Արթուր Ալեքսանյանը: Մեդալին մոտ էր նաև Կարապետ Չալյանը, սակայն պարտվեց բրոնզե մեդալի համար պայքարում: Կարեն Ասլանյանն ու Արմեն Մելիքյանե պայքարը լքեցին 1/4 եզրափակչից:
Հավաքականի մարզիչ Գևորգ Ալեքսանյանն այսօր ամփոփեց մեր մարզիկների ելույթները:
«Շնորհավորում եմ բոլոր մեդալակիրներին ու մասնակիցներին:
Ազատ ոճում մրցավարի գործոնը մեծ չէ, իսկ հունահռոմեականում մանր դետալները շատ են: Մրցավարը եթե ցանկանա, շատ մանրուքներ կարող է գտնել ու «պատժել» ըմբիշներից մեկին: Ես՝ լինելով մրցավար, շատ լավ տեղյակ եմ, թե ինչ կարող է անել մրցավարը: Արմեն Մելիքյանը լավ չէր զգում 2-րդ գոտեմարտից առաջ, միգուցե, թունավորում էր, և Արմենի պարագայում ոչինչ չենք կարող ասել մրցավարության մասին:
Իմ կարիերայի ընթացքում չեմ տեսել մի դեպք, երբ մաքուր հաղթանակը ֆիքսեն մրցավարները, հետո չեղարկեն հաղթանակը: Եթե չելենջ չկա, մրցավարները չեն կարող նայել կրկնապատկերը: Մինչև հաղթանակը արձանագրելը, մրցակցի մարտավկան չի սեղմել չելենջ: 3 մրցավարի կողմից եղել է արձանագրում: Մարզիկն արդեն ընդունել էր պարտությունը, չէր ցանկանում բարձրանալ: Սեղանի մրցավարը ցույց է տալիս՝ ով է հաղթել, հաղորդավարը բարձրաձայն տալիս է Կարեն Ասլանյանի անունը: Ժյուրիի անդամը «ստիպեց» սեղանի մրցավարին կրկին նայել կրկնապատկերը, և փոխվեց որոշումը: Ես նման բան չեմ տեսել:
Խնդրում եմ չքաղաքականացնել: Իմ բողոքը մրցավարության դեմ է: Ժյուրիի «թեթև ձեռքով» 5 տարվա աշխատանքը «ջուրն է ընկնում»:
77 կգ քաշային կարգում Չալյանը հասավ կիսաեզրափակիչ: Համարում եմ, որ կիսաեզրափակչում պարտությունն իմ մեղքն էր: Ուրեմն, ինչ-որ բան այն չէինք արել:
3-րդ տեղի համար գոտեմարտում մրցակիցը ադրբեջանցի էր: Պրովոկացիայի համար պետք է զգուշացնել, սակայն մրցավարները զգուշացում չտվեցին ադրբեջանցուն: Կարոյին նկատողություն տվեցին, մրցակցին՝ 2 միավոր, փոխվեց ամեն ինչ ու եղավ պարտություն:
97 կգ քաշային կարգի կիսաեզրափակչում Արթուրը պարտվում էր, «ստիպեց» մրցակցին իջեցնել պարտեր: Մրցակիցը ոտքն էր բռնել, որի պատճառով վնասվածք ստացավ, բայց դուրս եկավ եզրափակիչ:
Եզրափակչին լիարժեք պատրաստ չէր, բայց գնաց գոտեմարտի: Ուզում եմ ֆիքսել, որ մարզիկներ կան, որոնց հանդեպ մրցավարները բարեհամբույր են:
Առաջինը Արթուրին իջեցրին պարտեր: 32 վայրկյան Եվլոևը փորձում էր, սակայն չէր ստացվում: Արթուրը փակեց մրցակցին, 2 միավոր պետք է ստանար Արթուրը ու մարզիկներին հրավիրեին կանգնած դիրք: Ոչինչ, թող չլիներ 2 միավոր: Եվլոևը ձեռքով ցույց տվեց, որ չելենջ սեղմի մարտավկան՝ անհույս վիճակում լինելով: 2 րոպե մրցավարները փնտրեցին-փնտրեցին, չգիտեմ ինչ գտան ու 2 միավոր տվեցին Եվլոևին: Մրցավարները ոչինչ չարեցին, ժյուրին արեց իր գործը»,- ասաց Ալեքսանյանը:
«Մեզ մնում է՝ վերանայել ամեն ինչ, հավաքագրել փաստերն ու դիմել դատարան: Տեսնենք, ինչպես կլինի»,-հավելեց Ալեքսանյանը: