Ethernity Chain հարթակը հայտարարել է, որ արգենտինացի լեգենդար ֆուտբոլիստ Լիոնել Մեսսին թվային արվեստի (NFT) սեփական հավաքածուն կունենա։ Այն ստացել է Messiverse անվանումը․ հավաքածուն ընդհանուր առմամբ արվեստի 4 գործ կներառի, բայց այս պահին ներկայացվել է միայն 3-ը։ Վերջին աշխատանքը կներկայացվի օգոստոսի 20-ին՝ հավաքածուի պաշտոնական շնորհանդեսի օրը։
NFT աճուրդների ժամանակ նկարները կարող են վաճառվել միլիոնավոր դոլարներով։ Օրինակ, մարտի 11-ին Christie’s աճուրդի տունը ռեկորդային 69 մլն եվրոյով վաճառել է 5 հազար թվային նկարներից բաղկացած կոլաժը, որի հեղինակը նկարիչ Մայք «Beeple» Վինկելմանն է։
Իսկ ի՞նչ է NFT-ն․ Non Fungible Token՝ եզակի նշան։ Սա բլոկչեյնի մաս է կազմում։ Պայմանականորեն, NFT-ն նկարների պարագայում հաստատում է, որ այդ նկարն առկա է միակ եզակի օրինակով։ Դրանք, իհարկե, կարող են պատճենվել, բայց ոչ մի դեպքում չեն ազդի օրիգինալի վրա։
Մեսսիի՝ թվային արվեստի հավաքածուի նմուշները՝ ստորև․
Man From the Future ․ Լիոնել Մեսսիի լուսանկարը ֆուտուրիստական ոճով։
Worth the Weigh․ այստեղ պատկերված է ոսկե Լիոնել Մեսսին, որն իր ձեռքում մեծ ոսկե գնդակ է պահում։ Սա նման է նրան, թե ինչպես է Ատլասն իր ուսերին պահում երկրակամարը։
The King Piece․ այս լուսանկարը պատկերված է շախմատի տեսքով։ Անձամբ Մեսսին շրջանակված է ոսկե օղակով և ֆուտբոլային գնդակներով։
Մեսսիի բոլոր նկարները հեղինակել է BossLogic կեղծանվամբ հանդես եկող ավստրալացի նկարիչը։ Նա համագործակցում է Marvel-ի, Disney-ի և այլ հայտնի ընկերությունների հետ։
