Հայաստանի ֆուտբոլի ֆեդերացիան հունիսի 30-ին ամփոփեց «VBET Հայաստանի Պրեմիեր Լիգայի 2020/2021 մրցաշրջանի լավագույն ֆուտբոլիստ», ինչպես նաև «VBET Հայաստանի Պրեմիեր Լիգայի՝ 2020/2021 մրցաշրջանի լավագույն մարզիչ» անվանակարգերում քվեարկության արդյունքները:
Այսպիսով, լավագույն ֆուտբոլիստ ճանաչվեց «Ալաշկերտի» ավագ Արտակ Գրիգորյանը, իսկ լավագույն մարզիչ՝ «Արարատի» գլխավոր մարզիչ Վարդան Բիչախչյանը։
Ներկայացնում ենք՝ ինչպես էր քվեարկել ArmSport-ը․ մեր վերջնական քվեարկությունը կազմվել է խմբագրակազմի անդամների նախապես արված ներքին քվեարկության հիման վրա:
Դավիդ Դավիդյան․ «Ալաշկերտ»
«Ալաշկերտի» կիսապաշտպան Դավիդ Դավիդյանը կայուն խաղ էր ցուցադրում ողջ մրցաշրջանի ընթացքում: Եվ հենց նա էլ ճանաչվել էր առաջնության աշնանային հատվածի լավագույնը: Գարնանային հատվածում ֆուտբոլիստը շարունակեց աչքի ընկնել լավ խաղով, իսկ մայիս ամսին 6 խաղում 3 ասիստի հեղինակ դարձավ:
Պատահական չէ նաև, որ ռուսական և ղազախաղական թիմերը հետաքրքրություն են ցուցաբերում Դավիդյանի նկատմամբ։
Այս ամենի շնորհիվ էլ Դավիդյանը հայտնվեց մեր քվեարկության առաջին տեղում:
Վալերիո Վիմերկատի․ «Արարատ-Արմենիա»
26-ամյա իտալացի դարպասապահ Վալերիո Վիմերկատին, որը նոր մրցաշրջանից կներկայացնի «Արարատ-Արմենիան», ողջ տարվա ընթացքում հիանալի խաղ անցկացրեց «Նոայի» կազմում։ Ընդգծելու համար նրա խաղամակարդակը՝ նշենք, որ երբ հայտարարվեց նրա՝ «Նոայից» հեռանալու մասին, երկրպագուները մեծ ափսոսանք հայտնեցին, որ նման դարպասապահը, հնարավոր է, հեռանա VBET ՀՊԼ-ից։
Եթե խոսենք չոր թվերով, Վալերիոն մրցաշրջանի ընթացքում ամենաշատ սեյվ արած դարպասապահն է։ Դրանց թիվը հասնում է 67-ի։ Իսկ դրանցից մեկը մեզանից շատերը չեն մոռանա, եթե հետևել են ՀՊԼ 18-րդ տուրի՝ «Ալաշկերտի» դեմ խաղին։
Այսպիսով, Վալերիոն մեր քվեարկության արդյունքում հայտնվել է 2-րդ տեղում։
Կարեն Մուրադյան․ «Արարատ»
«Արարատի» կիսապաշտպան Կարեն Մուրադյանը ևս մրցաշրջանի ընթացքում աչքի ընկավ հաջող խաղով և նույնիսկ գրավեց Հայաստանի ազգային հավաքականի գլխավոր մարզիչ Խոակին Կապառոսի ուշադրությունը։ Մուրադյանը ողջ տարվա ընթացքում օգնեց թիմին առաջնությունում պայքարել բարձր հորիզոնականների համար, ինչպես նաև նվաճել երկրի գավաթը։
Կարենը մեր ցուցակի 3-րդ տեղում է:
Դմիտրի Գունկո․ «Արարատ-Արմենիա»
Դմիտրի Գունկոն, որը մրցաշրջանի ավարտից հետո գլխավորեց «Արարատ-Արմենիան», նախորդ տարվա հոկտեմբերից ստանձնել էր «Նոայի» գլխավոր մարզչի պաշտոնը։ Այս մասնագետի գլխավորությամբ «Նոան» ողջ ընթացքում որակյալ խաղ էր ցույց տալիս՝ պայքարելով չեմպիոնության համար։ Արդյունքում, թիմը գրավեց մրցաշարային աղյուսակի 2-րդ տեղն ու դարձավ երկրի փոխչեմպիոն։ «Նոան» Հայաստանը կներկայացնի եվրագավաթներում, բայց արդեն առանց Գունկոյի, որի խաղային գեղեցիկ ձեռագիրն արդեն կտեսնենք երկրի կրկնակի չեմպիոնի ղեկին։
Գունկոն մեր ցուցակի 1-ին տեղում էր։
Վարդան Բիչախչյան․ «Արարատ»
Վարդան Բիչախչյանը հայկական ֆուտբոլի ամենակայուն խաղ-արդյունք ապահովող մարզիչներից է։ «Շիրակի» հիմնական կորիզի հետ «Արարատ» տեղափոխված մարզիչն այստեղ էլ կարողացավ հաջողություններ գրանցել․ նախ, 13 տարի անց «Արարատին» նորից պարգևեց գավաթակիր դառնալու բերկրանքը, ապա մինչև վերջ պայքար մղեց առաջնությունում բարձր հորիզոնականների համար։ Թեև երևանյան ակումբն առաջնությունն ավարտեց 4-րդ հորիզոնականում՝ ընդամենը մեկ միավորով հետ մնալով «Նոայից» ու «Ուրարտուից», բայց այն ևս Հայաստանը կներկայացնի եվրագավաթներում։
Բիչախչյանը մեր քվեարկության 2-րդ տեղում է։
Ալեքսանդր Գրիգորյան․ «Ալաշկերտ»
Չնայած այն հանգամանքին, որ «Ալաշկերտը» հռչակվեց Հայաստանի չեմպիոն ու մեր երկիրը կներկայացնի Չեմպիոնների լիգայում, գլխավոր մարզիչ Ալեքսանդր Գրիգորյանը հայտնվել է մեր ցուցակի 3-րդ տեղում։ Ամենևին չնսեմացնելով մարզչի կատարած աշխատանքը, պետք է փաստել, որ Գրիգորյանն «Ալաշկերտի» ղեկը ստանձնեց միայն մայիսին, երբ թիմն արդեն չեմպիոնական մրցավազքում էր և ընդամենը 4 միավորով էր հետ մնում այդ ժամանակվա առաջատար «Նոայից»։
Ստելլա Բաբլոյան
