«Վիլյառեալը» դուրս եկավ Եվրոպա լիգայի եզրափակիչ՝ կիսաեզրափակչի պատասխան խաղում ոչ-ոքի խաղալով «Արսենալի» հետ։ Իսպանական ակումբի գլխավոր մարզիչ Ունայ Էմերիի համար առաջիկա եզրափակիչը կլինի 5-րդը կարիերայում։
էմերին 3 տարի անընդմեջ՝ 2014-ից 2016 թվականներին, «Սևիլիային» դուրս է բերել եվրոպական ակումբի ֆուտբոլի կարևորությամբ երկրորդ մրցաշարի եզրափակիչ։ Բոլոր երեք դեպքում էլ «Սևիլիան» նվաճել է ԵԼ-ի Գավաթը։ Իսկ 2019 թվականին Էմերին եզրափակիչ է դուրս բերել «Արսենալին», բայց նրա թիմը տիտղոսը զիջել է Լոնդոնի «Չելսիին»։
Ավելի վաղ Էմերին մրցաշարի ռեկորդ էր սահմանել մարզիչների շրջանում՝ կարիերայի ընթացքում 6-րդ անգամ թիմին դուրս բերելով Եվրոպա լիգայի կիսաեզրափակիչ։ Բացի «Վիլյառեալից» և «Սևիլիայից», Էմերին մեկական անգամ էլ կիսաեզրափակիչ էր դուրս բերել «Վալենսիային» և «Արսենալին»։