Ապրիլի 29-ին տեղի ունեցավ Հայաստանի ֆուտբոլի ֆեդերացիայի կարգապահական և էթիկայի կոմիտեի նիստը` ՀՖՖ Կարգապահական և էթիկայի կոմիտեի նախագահ Կարեն Հովհաննիսյանի նախագահությամբ:
Այս մասին հայտնում է ՀՖՖ-ի պաշտոնական կայքը։
Նիստի արդյունքում կայացվել են մի շարք որոշումներ, մասնավորապես,«Նոա»-«Ալաշկերտ» խաղին «Ալաշկերտ» թիմի ֆուտբոլիստ Տարոն Ոսկանյանի հեռացման համար, որոշվել է ֆուտբոլիստին որակազրկել 1 խաղով, իսկ երևանյան թիմին տուգանել 25 հազար դրամով։
Բայց այսքանով «Նոա»-«Ալաշկերտ» խաղի խնդրահարույց հարցերի քննարկումը չի ավարտվել։ Մասնավորապես, «Նոա» թիմի կողմից ներկայացված արձանագրության մեջ նշված է եղել և խաղի
ժամանակ տեխնիկական գոտում է գտնվել որակազրկված պաշտոնյա՝ թիմի գլխավոր մարզիչ Դմիտրի Գունկոն, ինչի համար ակումբը տուգանվել է 100 հազար դրամով։
«Նոա»-«Ալաշկերտ» հանդիպման 2-րդ խաղակեսի ավելացված ժամանակում «Նոա» թիմի գլխավոր
մարզիչ Դմիտրի Գունկոն անհամաձայնություն է հայտնել մրցավարի կայացրած որոշմանը և ձեռքում եղած ջրի շիշը նետել խաղադաշտ։ Այդ արարքի համար վերջինս պատժվել է դեղին քարտով: ՀՖՖ կարգապահական կոմիտեն միաձայն որոշել է Գունկոյին որակազրկել մեկ խաղով։
«Նոան» նաև տուգանվել է 20 հազար դրամով, քանի որ խաղին չի գործել տոմսային համակարգն ու խաղի մուտքը եղել է ազատ:
Այս խաղում ևս մեկ միջադեպ է գրանցվել։ «Ալաշկերտի» նախագահ Բագրատ Նավոյանը հանդիպման ավարտից հետո ներխուժել է մրցավարների հանդերձարան՝ խաղի մրցավարության հետ կապված դժգոհությունը արտահայտելու համար։ Խոսակցության ընթացքում Բագրատ Նավոյանը մրցավարների հասցեին արել է որոշ արտահայտություններ, որոնք իրենց մեջ վիրավորական տարրեր են պարունակել։ Արդյունքում, որոշվել է «Ալաշկերտին» տուգանել 100 հազար դրամի չափով։
Նիստի ամբողջական արձանագրությանն ու կայացրած որոշումներին կարող եք ծանոթանալ այստեղ։
