Հատկանշական է, որ VBET Հայաստանի Գավաթի կիսաեզրափակիչ փուլում հանդես են գալիս ՀՊԼ մրցաշարային աղյուսակի առաջին քառյակը կազմող թիմերը։ Նշենք, որ Հայաստանի Գավաթը մեր թիմերի համար բացի պատվավոր տիտղոս լինելուց, հանդիսանում է նաև եվրագավաթներին մասնակցելու համար ուղեգիր։
🏆 Նոա — Ալաշկերտ
VBET Հայաստանի Գավաթի խաղարկության կիսաեզրափակիչ փուլի առաջին դիմակայության առաջին խաղի շրջանակում «Ալաշկերտն» ու գործող գավաթակիր «Նոան» փոխանակեցին մեկական գնդակ: Երկու գնդակներն էլ գրանցվեցին 11-մետրանոց հարվածներից․ 66-րդ րոպեին Պետրոս Ավետիսյանը հստակ իրացրեց 11-մետրանոց հարվածն ու առաջ մղեց հյուրերին: Հիմնական ժամանակի ավարտից 8 րոպե առաջ Գլիշիչը խփեց պատասխան գնդակն ու դրեց խաղի վերջակետը՝ հստակ իրացնելով հաջորդ 11-մետրանոցը:
Պատասխան խաղից առաջ դժվար է ասել, թե որ թիմը դուրս կգա եզրափակիչ․ երևանյան երկու թիմերի դիմակայությունները միշտ էլ անկանխատեսելի են և միշտ մեզ մատուցում են լարված, թեժ ու անզիջում պայքար։ Թիմերը վերջերս հանդիպեցին նաև ՀՊԼ-ի 21-րդ տուրում, որտեղ «Նոան» սեփական հարկի տակ նվազագույն հաշվով հաղթեց «Ալաշկերտին» և գլխավորեց մրցաշարային աղյուսակը։ Գավաթային պատասխան խաղում Գունկոյի թիմի առավելությունը թերևս մրցակցի հարկի տակ խփած գնդակն է։ Այնպես որ, մեզ սպասվում է ևս մեկ անչափ հետաքրքիր հանդիպում արդեն այսօր, ժամը 15։00-ին։
🏆 Արարատ — Արարատ-Արմենիա
«Արարատ-Արմենիան» կարող է երկրորդ անգամ անընդմեջ դուրս գալ այս մրցաշարի եզրափակիչ։ Սակայն դա շատ բարդ առաքելություն կլինի, քանի որ առաջին խաղում հանդիպումն ավարտվեց 2-0 հաշվով՝ հօգուտ «Արարատի»։ Հանդիպման գոլերն իրենց ակտիվում գրանցեցին Ուրոշ Նենադովիչն ու Մարկո Պրլևիչը։
Հայաստանի 5-ակի գավաթակիր «Արարատը» վերջին անգամ այս տիտղոսը նվաճել է 2008թ և «Արարատ-Արմենիայի» հետ առաջին խաղից հետո մեկ քայլով էլ ավելի մոտ է կրկին Հայաստանի Գավաթի եզրափակչում հանդես գալուն։ Սակայն չշտապենք Բիչախչյանի թիմին օծել որպես եզրափակչի մասնակից, միգուցե Բայդաչնիի թիմը կկարողանա դեռ անակնկալ մատուցել։ Դա կիմանանք արդեն վաղը՝ մայիսի 1-ին․ հանդիպման մեկնարկը՝ 15։00-ին։
Ստելլա Բաբլոյան