«Լիվերպուլն» իր պաշտոնական կայքում հայտարարություն է հրապարակել՝ կապված ՉԼ քառորդ եզրափակչի՝ «Ռեալի» դեմ խաղից հետո (1-3) թիմի պաշտպան Տրենտ Ալեքսանդր-Առնոլդի ու կիսապաշտպան Նաբի Կեյտայի սոց․էջերը հարձակման ենթարկելու հետ։
«Ցավոք, հերթական անգամ մենք ստիպված ենք խաղի հաջորդ օրը զզվելի ռասիստական վիրավորանքներ քննարկել։ Դա բացարձակապես անընդունելի է ու պիտի վերջ դրվի դրան։ Ակումբը քննարկում է խտրականության բոլոր ձևերն ու շարունակում աշխատել ընկերությունների հետ դրանց դեմ։ Մենք մեր ֆուտբոլիստներին ցանկացած աջակցություն ցույց կտանք, որի կարիքը նրանք կզգան։ Մենք նաև կօգնենք իդենտիֆիկացնել ու, եթե հնարավոր լինի, պատժել դրա հետևում կանգնածներին։
Մենք գիտակցում ենք, որ այս ամենը բավարար չի լինի քանի դեռ սոցկայքերն ու մարմինները, որոնք պատասխանատու են դրանց կարգավորումների համար, ավելի խիստ չափանիշներ չընդունեն։ Ներկայիս իրավիճակին չի կարելի թույլ տալ, որ ավելի զարգանա, ու դրա պատասխանատվությունը մեզնից յուրաքանչյուրի վրա է»,- ասված է հայտարարության մեջ։
