Հայաստանի ազգային հավաքականի ֆուտբոլիստ Արտակ Գրիգորյանն ԱԱ-2022-ի ընտրական փուլի երրորդ տուրի՝ Ռումինիայի նկատմամբ տարած հաղթանակից հետո նշել է՝ շատ ուրախ են, որ կարողանում են մեր ազգին փոքր-ինչ ուրախացնել:
«Գիտեինք, որ շատ դժվար խաղ էր մեզ սպասվում, 3-րդ խաղն էր ու բոլորիս մոտ հոգնածություն կար: 1-2-ի ժամանակ անգամ մի պահ եղավ, որ կոտրվել էինք, չէինք սպասում, որ գոլ կխփենք: Բայց հետո հավաքվեցինք, Հարոյանի գոլը վճռորոշ եղավ:
Միայն դրական էմոցիաներ ունեմ: Այսպիսի ապրումներ էլի եմ ունեցել, բայց այս պահին՝ հաշվի առնելով մեր միավորները, մրցաշարային աղյուսակում դիրքը ու մեր նպատակները, բոլորովին այլ էմոցիաներ են:
Շնորհակալ ենք մեր երկրպագուներին: Ուրախ ենք, որ այս խառը իրավիճակում կարողանում ենք մեր ազգին մի փոքր ուրախացնել»,- ասել է Արտակ Գրիգորյանը լրագրողների հետ զրույցում:
Հիշեցնենք՝ Հայաստանի հավաքականը երեք խաղից հետո 9 միավոր է վաստակել ու միանձնյա գլխավորում է J խմբի մրցաշարային աղյուսակը: Հյս. Մակեդոնիան 6 միավորով երկրորդն է: Գերմանիան նույնքան միավոր ունի իր ակտիվում ու գտնվում է երրորդ հորիզոնականում: Ռումինիան 4-րդն է 3 միավորով, Իսլանդիան նույնքան միավորով 5-րդ տեղում է: Աղյուսակը եզրափակում է Լիխտենշտեյնի ընտրանին (0):
