«Բարսելոնան» նորից է մտածում «Ինտերի» հարձակվող Լաուտարո Մարտինեսին ձեռք բերելու մասին:
23-ամյա հարձակվողի տրանսֆերն առաջնային էր կատալոնացիների համար նախքան կորոնավիրուսի համավարակը, որը լրջորեն ազդեց ակումբի ֆինանսական վիճակի վրա: Հիմա «Բարսան» նորից է մտածում այդ մասին: Ակումբը կփորձի կազմակերպել գործարքը, եթե չկարողանա պայմանագիր կնքել «Բորուսիայի» հարձակվող Էրլինգ Հոլանդի հետ, գրում է Mundo Deportivo-ն:
Լաուտարոյի պայմանագիրը «Ինտերի» հետ ավարտվում է 2023 թվականին: Վերջերս ֆուտբոլիստը խոսում էր ակումբի հետ նոր պայմանագիր կնքելու մտադրության մասին, սակայն «Ինտերի» ֆինանսական վիճակը ևս լավ չէ: Տեղեկություն տարածվեց, որ «Ինտերը» վաճառվում է, սակայն միլանցիների նախագահ Սթիվեն Չժանը հերքեց այդ տեղեկությունը:
Ընթացիկ մրցաշրջանում Լաուտարոն «Ինտերի» կազմում բոլոր մրցաշարերում 37 հանդիպման է մասնակցել, որոնցում դարձել է 16 գոլի և 9 գոլային փոխանցման հեղինակ:
