Չեմպիոնների լիգայի լիգայի փուլի 3-րդ տուրի կենտրոնական հանդիպմանը «Պարի Սեն Ժերմենը» սեփական հարկի տակ 4:2 հաշվով առավելության հասավ կատալոնական «Բարսելոնայի» նկատմամբ։
Հանդիպումից հետո փարիզյան ակումբի գլխավոր մարզիչ Լուիս Էնրիկեն ամփոփել է դրամատիկ դիմակայությունը, բացահայտել հաղթանակի գլխավոր գրավականը, առանձնացրել Լուկա Էրնանդեսի փայլուն խաղը և հայտնել թիմի կադրային կորուստների մասին։
«Բարսելոնայի» հզորության և պաշտպանական բանալու մասին
«Սա ամենաբարձր մակարդակի հանդիպում էր՝ անհավանական մրցակցի դեմ։ «Բարսելոնայի» ֆուտբոլիստների անհատական վարպետությունն ուղղակի ապշեցուցիչ է. սա առավելագույն մակարդակն է, որին կարող ես բախվել ֆուտբոլում։
Առաջին խաղակեսում մենք սենսացիոն խաղ ցուցադրեցինք՝ անընդհատ խլելով գնդակը։ Հետո կարողացանք հաղթահարել բարդ պահերը. ստիպված եղանք պաշտպանվել ցածր բլոկով, անցանք հակագրոհների և կարողացանք գոլեր խփել։ Դա ապացուցում է, որ մենք ունակ ենք հարմարվել ցանկացած իրավիճակի։ Ես տեսա սովորական ՊՍԺ-ին՝ մեր ագրեսիվ ոճով։ Շատ դժվար էր այդ կերպ պաշտպանվելը, բայց համոզված եմ, որ հենց դա դարձավ մեր հաղթանակի բանալին։ Մենք հաղթեցինք մի թիմի, որն ընթացիկ մրցաշրջանում դեռ պարտություն չէր կրել և մեկ խաղում միջինը 4 գոլ էր խփում, իսկ մենք բաց թողեցինք ընդամենը երկուսը»։
Լուկա Էրնանդեսի խաղի մասին
«Լուկա Էրնանդե՞սը. մենք տեսանք մեծ փորձ ունեցող և հավակնոտ ֆուտբոլիստի, որը միշտ պատրաստ է պայքարի։ Դեռ խաղից առաջ գիտեինք, որ նա հիանալի աշխատանք է կատարելու։ Նա ագրեսիվ է, բայց երբեք անհեթեթ ու հիմար խախտումներ թույլ չի տալիս։ Լուկան ամեն ինչ գերազանց կատարեց և պարզապես անհավանական հանդիպում անցկացրեց աշխարհի լավագույն ֆուտբոլիստներից մեկի՝ Յամալի դեմ։ Նա շատ կարևոր խաղացող է մեր թիմի համար. ուրախ եմ նրա համար, նա արժանի էր դրան»։
Երեկոյի ամենավատ լուրը՝ 3 վնասվածք
Հաղթական էյֆորիային զուգահեռ՝ իսպանացի մասնագետը մտահոգություն է հայտնել թիմում առկա վնասվածքների կապակցությամբ.
«Ես բժիշկ չեմ, պետք է սպասենք վաղվա բուժզննման արդյունքներին՝ իրավիճակը հստակ հասկանալու համար։ Մենք ունենք երեք վնասվածք ստացած ֆուտբոլիստ, երեք առանցքային խաղացող, և սա երեկոյի ամենավատ լուրն է մեզ համար»։
Հանդիպման լավագույն ֆուտբոլիստը
ՈւԵՖԱ-ի վարկածով՝ ՊՍԺ – «Բարսելոնա» հանդիպման լավագույն ֆուտբոլիստ է ճանաչվել տանտերերի 21-ամյա հարձակվող Դեզիրե Դուեն։ Երիտասարդ ֆրանսիացին փայլուն հանդիպում է անցկացրել՝ դառնալով մեկ գոլի և մեկ գոլային փոխանցման հեղինակ։
Հավելենք, որ 3 տուրերից հետո ՊՍԺ-ն 9 միավորով միանձնյա գլխավորում է Չեմպիոնների լիգայի մրցաշարային աղյուսակը, իսկ «Բարսելոնան» 6 միավորով 5-րդ հորիզոնականում է։
