Ի՞նչ է անցնում Ձեր մտքով առաջին հերթին, երբ լսում եք “Ճապոնիա”․ սուշի, Ֆուձիյամա, ավտոմեքենաներ կամ անիմե՞․․․ իսկ միգուցե Մինամինո՞, կամ Կուբո՞․․․ վերջին մի քանի ամիսների ընթացքում շատերը պարզեցին, որ Ճապոնիայում կան նաև տաղանդավոր ֆուտբոլիստներ․․․
Տպավորված Մինամինոյի «Լիվերպուլ» տեղափոխությունից ՝ ArmSport․am-ը ցանկանում է Ձեզ ծանոթացնել ևս 5 ճապոնացի ֆուտբոլիստների, ովքեր արժանի են առավելագույն ուշադրության: Մեր այսօրվա հերոսներին ընտրել ենք այն ճապոնացի ֆուտբոլիստների դեսանտից, ովքեր արդեն ելույթ են ունենում Եվրոպայում։
Շոյա Նակաջիմա
25 տարեկան
«Պորտու»
Կիսապաշտպան
20 հանդիպում / 1 գոլ
2019/20 մրցաշրջանում
Ըստ Transfermarkt-ի՝ Նակաջիման հենց այս պահին ամենաթանկ ճապոնացի ֆուտբոլիստն է. «Պորտուի» կիսապաշտպանը գնահատվում է 25 միլիոն եվրո: Այս ֆուտբոլիստը հետաքրքիր պատմություն ունի, քանի որ նա Պորտուգալիայի առաջնությունում իր մասին լսեցնել տվեց «Պորտիմոնենսեյի» կազմում, և նախորդ տարվա սկզբին նրան գնել էր քաթարյան «Ալ Դուհաիլ» ակումբը 35 միլիոն եվրոյով, բայց ընդամենը մի քանի ամիս անց, երեք անգամ ավելի փոքր գումարով․ նա վերադարձավ Պորտուգալիա: Շեյխերը մնացին «մինուսով», իսկ «վիշապները» ստացան մի տղայի, ով ցանկանում է նվաճել Եվրոպան:
Տակեհիրո Տոմիյասու
21 տարեկան
«Բոլոնիա»
Պաշտպան
14 հանդիպում իտալական ակումբի կազմում
2019/20 մրցաշրջանում
«Բոլոնիայի» բարձրահասակ աջ պաշտպանը, կարծես, հեռուն կգնա իր մեծ քայլերով: 2018-ի ամռանը Տոմիասուն Ճապոնիայից տեղափոխվեց Եվրոպա, ընտրեց ճիշտ ակումբ որպես ցատկահարթակ ՝ բելգիական «Սենթ Տրյուդենը»: Բելգիայում մեկ տարի անցկացնելուց հետո Տակեհիրոյի տրանսֆերային արժեքը բարձրացավ 10 անգամ. Բոլոնիան ներկայացնող ակումբը վճարեց 9 միլիոն եվրո պաշտպանի համար և բոլորովին չի ափսոսում դրա համար, քանի որ Տոմիասուն խաղում է մեկնարկային կազմում, և նույնիսկ նա արդեն երկու գոլային փոխանցում է կատարել Ա Սերիայի շրջանակներում: Պատահական չէ, որ իտալական գրանդները արդեն իսկ հետաքրքրված են աշխատասեր պաշտպանի ծառայություններով։
Մասայա Օկուգավա
23 տարեկան
«Զալցբուրգ»
Կիսապաշտպան
22 հանդիպում / 8 գոլ
2019/20 մրցաշրջանում
Իսկ Դուք կարծում էիք Մինամինո՞ն էր միակ ճապոնացին ավստրիական ակումբում․․․ Ահա ծագող արևի երկրի ևս մեկ ներկայացուցիչ, ով նույնպես հիանալի մրցաշրջան է անցկացնում։ Նա, ինչպես Մինամինոն, ունիվերսալ ֆուտբոլիստ է․ խաղում է թե՛ կիսպաշտպանության եզրերում, թե՛ ենթահարձակվողի դիրքում։ Շատ կարևոր է նաև այն հանգամանքը, որ բացի բավականին լավ գոլային հոտառությունից, Մասայան նաև հանդես է գալիս որպես արդյունավետ դիսպետչեր․ 6 գոլային փոխանցում այս մրցաշրջանում։ Շուտով կտեսնենք, թե այս մրցարջանից հետո ո՞ր ակումբները կպայքարեն տաղանդավոր ասիացու տրանսֆերի համար։
Դաիչի Կամադա
23 տարեկան
«Այնտրախտ»
Կիսապաշտպան
30 հանդիպում / 4 գոլ
2019/20 մրցաշրջանում
Ճապոնացի այս ֆուտբոլիստին «Այնտրախտը» գնել էր 2,5 տարի առաջ, բայց Դաիչին այդպես էլ չկարողացավ միանգամից փայլել Բունդեսլիգայում։ Սակայն անցած մրցաշրջանում «Սենթ Տրյուդենում», որտեղ հանդես էր գալիս վարձավճարով, հայրենակից Տոմիասուի կողքին, հարձակվողական ոճի կիսապաշտպանը փայլուն ֆուտբոլ ցուցադրեց. նա խփեց 16 գոլ, կատարեց 9 գոլային փոխանցում: Չնայած ընթացիկ մրցաշրջանը «Այնտրախտի» համար չի ընթանում այնպես, ինչպես նախորդն էր, սակայն Կամադայի ցուցադրած ֆուտբոլը հույս է ներշնչում, որ գերմանական ակումբում ամեն ինչ այդքան էլ վատ չէ:
Ռիցու Դոան
21 տարեկան
ՊՍՎ
Կիսապաշտպան
18 հանդիպում / 2 գոլ
2019/20 մրցաշրջանում
Նախորդ ամռանը ճապոնացուն կապում էին ռուսական «Սպարտակի» և ԲԿՄԱ-ի հետ, բայց Ռիցուն նախընտրեց արևմուտքը: ՊՍՎ-ն Նիդեռլանդներում ճապոնացու առաջին թիմը չէ, նա մինչ այդ հանդես էր գալիս «Գրոնինգենում», իսկ ամռանը նա տեղափոխվեց ՊՍՎ`7,5 միլիոն եվրոյի դիմաց, որտեղ կա ավելի շատ մրցակցություն և ավելի մեծ պահանջներ։ Սակայն Ռիցուն վախկոտներից չէր․ նա բավականին արագ ադապտացվեց նոր թիմում և այժմ հանդիսանում է թիմի հիմնական խաղացող։ Մասնագետների մի մասը հենց Դոանին են համարում Ճապոնիայի հավաքականի ապագա աստղը, ով աչքի է ընկնում իր տարիքի համար բավականին հասուն խաղով և ունի իսկական առաջատարի հատկանիշներ։
Եվ այս ֆուտբոլիստները Եվրոպայում հանդես եկող ոչ բոլոր ճապոնացիներն են: Բազմաթիվ «սամուրայներ» այժմ խաղում են Բելգիայում և Նիդեռլանդներում, պորտուգալացիները նույնպես սկսել են աշխատել ճապոնական շուկայում, «Պորտիմոնենսեն» այս շարժման առաջատարն է, երիտասարդ ճապոնացի ֆուտբոլիստները չեն վախենում գնալ Ավստրիա և Գերմանիա: «Բարսելոնայի» երկրորդ թիմում խաղում է 20-ամյա Հիրոկի Աբեն, իսկ Կուբոյին և Մինամինոյին գիտենք արդեն բոլորս․․․
Վար Բաբայան
Շարքի նախորդ մասերը
Բրազիլիայի առաջնության ամենահեռանկարային ֆուտբոլիստները (Մաս 2)
Բրազիլիայի առաջնության ամենահեռանկարային ֆուտբոլիստները (Մաս 1)
