«Վանի» 25-ամյա դարպասապահ Հենրի Ավագյանը Հայաստանի Պրեմիեր-լիգայի 16-րդ տուրի՝ «Արարատի» հետ խաղի երկրորդ կեսում երկու դեղին քարտ ստացավ ու Չարենցավանը ներկայացնող թիմը մնաց 10 հոգով:«Վանը» պայքարեց մինչև վերջ ու պահեց ոչ-ոքի՝ 0-0 արդյունքը:
ArmSport-ը «Վանի» դարպասապահի հետ խոսել է կարիերայի առաջին կարմիր քարտի, առաջատարի հետ կարևոր խաղում ռիսկային գործողությունների ու «Վանի» նպատակների մասին.
«Դաշտում չկար բացարձակ ֆավորիտ, հավասար խաղ էր ընթանում: Ինչ վերաբերում է իմ խաղին, ապա առաջին դեղին քարտի դեպքում ժամանակ ձգելու միտում առհասարակ չունեի, պարզապես մի քիչ երկարեց ու մրցավարն էլ դեղին քարտ ցույց տվեց: Երկրորդ դեղին քարտի պարագայում, արդեն վերջնամասն էր ու պետք է արագ որոշում կայացնեի, ու որոշեցի նման ձևով կանգնեցնել խաղը, քանի որ նկատել էի՝ «Արարատի» խաղացողն ուզում էր գնդակն արագ խաղի մեջ մտցնել, իսկ կայացրածս որոշումն այդ պահին միակ տարբերակն էր թիմին վերահաս գոլից փրկելու համար:
Խաղի վերջում արդեն թիմս շատ լավ պաշտպանվեց ու պահպանեց տրամաբանական ոչ-ոքին»,- ասում է «Վանի» դարպասապահը:
Հենրին խոստովանում է՝ այդ պահին չէր մտածում կարմիրի մասին, իսկ հիմա արդեն այդ ռիսկային քայլն արդարացված է համարում.
«Ամեն ինչ այնքան արագ եղավ, որ նույնիսկ մտածելու ժամանակ չկար: Պետք էր ինչ-որ բան անել: Այդ ժամանակ չէի մտածում կարմիր քարտի մասին, այլ մտածում էի՝ ինչ անեմ, որ թիմը գոլ բաց չթողնի: Ամեն դեպքում, սա ֆուտբոլ է և ռիսկային քայլերը հաջորդում են մեկը մյուսին: Իմ ռիսկային քայլն էլ համարում եմ արդարացված,քանի որ գոլ բաց չթողեցինք, չնայած՝ խաղավերջում մնացել էինք 10 հոգով»:
Հենրին համակարծիք չէ այն մտքի հետ, թե իրենք կարևոր միավորներ խլեցին առաջատարից, ասում է՝ իրենք էլ էին պայքարում երեք միավորի համար.
«Ինչպես մենք, այնպես էլ «Արարատը», խաղում էր 3 միավորի համար: Ընդհանուր առմամբ, «Արարատը» լավ տպավորություն է թողնում այս մրցաշրջանում: Խաղին էլ լավ էինք պատրաստվել: Պաշտպանական գոտին լավ գործեց ու կարողացանք գրեթե բոլոր վտանգավոր գրոհները կանխել: Ամեն խաղին թիմի մոտ առաջընթաց է նկատվում, հուսով եմ՝ շուտով կլինի այդքան սպասված հաղթանակը, որն էլ ավելի մեծ վստահություն կտա թիմին»:
Իսկ ինչ խնդիրներ են դրված «Վանի» առջև և որքանով են դրանք իրատեսական՝ հաշվի առնելով թիմի ներկայիս վիճակն ու պոտենցինալը, ինչպես նաև մրցակցությունը.
«Իհարկե, բոլոր թիմերը ցանկանում են եվրագավաթների ուղեգիր ստանալ, ու մենք էլ բացառություն չենք: Առաջնության հանդիպումները ցույց տվեցին, որ գրեթե բոլորում էլ կարող էինք հաղթել և միանշանակ արժանի ենք գրավել ավելի բարձր հորիզոնական: Մենք ամեն խաղի դուրս ենք գալիս 3 միավորի համար, որը իրատեսական է»:
Հենրին ընդգծում է՝ նոր մարզիչների հետ համագործակցությունը շատ լավ է ստացվում.
«Մենք բոլորս պրոֆեսիոնալներ ենք ու աշխատում ենք ամեն ինչ անել, որպեսզի հնարավորինս արագ և որակով կատարենք նոր մարզիչների պահանջները: Համագործակցությունը շատ լավ է, քանի որ և՛ մարզիչները, և՛ մենք մեկս մյուսին օգնելով փորձում ենք առաջ գնալ: Թիմում մթնոլորտը շատ լավ է: Ունենք նորեկներ, որոնք նույնպես շատ արագ փորձում են հարմարվել թիմին»:
Ավելին, ասում է՝ հենց նոր մարզիչների օրոք է ինքը սկսել ավելի շատ խաղաժամանակ ստանալ.
«Ալաշկերտից» հեռանալուս հիմնական պատճառը քիչ խաղաժամանակ ստանալն էր: «Վան» տեղափոխվեցի հենց այդ խնդրի պատճառով: Առաջնության առաջին հատվածում նույնպես քիչ խաղաժամանակ էի ստանում, բայց եղավ մարզչական փոփոխություն ու նոր մարզիչները լիովին վստահում են ինձ:
Նպատակս «Վանի» հետ աչքի ընկնել վստահ ու կայուն խաղով, օգնել ակումբին հասնել իր նպատակներին և կրկին հրավիրվել ազգային հավաքական»,- ասում է Հենրի Ավագյանը:
Այս հանդիպումից հետո «Վանը» իր միավորների թիվը հասցրեց 12-ի և մրցաշարային աղյուսակի 7-րդ հորիզոնականն է զբաղեցնում: «Արարատը» շարունակում է գլխավորել աղյուսակը՝ իր ակտիվում ունենալով 25 միավոր: Վարդան Բիչախչյանի թիմը, սակայն, երկրորդ տեղում ընթացող «Ալաշկերտին» գերազանցում է ընդամենը մեկ միավորով: Ի դեպ, «Ալաշկերտը» մեկ խաղ պակաս է անցկացրել::
