«Ով էլ՝ ընտրվի, եթե ունենա իմ մասնագիտական հնարավորություններն օգտագործելու կարիքը, ես պատրաստ եմ օգնել բոլորին՝ հանուն հայկական բռնցքամարտի»,- ArmSport-ի հետ զրույցում ասում է Հայաստանի բռնցքամարտի ֆեդերացիայի նախկին նախագահ Արթուր Գևորգյանը, որն առաջիկա ընտրություններում իր թեկնածությունը չի առաջադրելու:
Արդեն հայտնել էինք, որ ֆեդերացիայի նախագահի ընտրությունների անցկացման լիազորությունը, փոխանցվել է ՀՀ սպորտի և երիտասարդության հարցերի նախարարությանը:
-Պարոն Գևորգյան, հայկական բռնցքամարտում արդեն տարիներ ձգվող իրավիճակի լուծման ի՞նչ ճանապարհ եք տեսնում՝ երկու ֆեդերացիա, երկու հավաքական …
-Ինչպես գիտեք՝ տևական ժամանակ է՝ դադարեցրել եմ իմ՝ ֆեդերացիայի նախագահի լիազորությունները, բայց շարունակում եմ, այսպես ասած, տիրություն անել ֆեդերացիային, քանի դեռ նոր ընտրություններ չեն եղել: Չէր կարելի անտեր թողնել, պետք է ֆինանսավորել, պետք է հարցեր լուծել, մարդիկ պետք է աշխատավարձեր ստանան: Իսկ ինչ վերաբերում է երկու ֆեդերացիա, երկու հավաքական պնդմանը, կարող եմ ասել, որ նման բան չկա, դրանք հորինված սուտ բաներ են: Գոյություն ունի մեկ ֆեդերացիա, որը ճանաչված է միջազգային կառույցի կողմից, որը կարողանում է մրցաշարերի մասնակցել: Մյուս ֆեդերացիան նույնն է, ինչ ցանկացած մարզադպրոց: Հայաստանում կա այդպիսի 30-40 ֆեդերացիա: Դա կեղծ օրակարգ է և հորինված բան: Նման ստերով և կեղծ օրակարգերով երկիրը քանդեցին, ինչի՞ մասին է խոսքը: Ինչպես գիտեք, իմ անձի շուրջ իրականացվող քաղաքական հետապնդումների պատճառով ես որոշեցի դադարեցնել իմ լիազորությունները, քանի որ ես չեմ ուզում, որ երկրում տիրող այն տրամադրությունները, որ կան իմ անձի նկատմամբ, անդրադառնան մարզիկների ու իրենց հաջողությունների վրա: Աստված իրենց հետ: Հիմա պետք է ամեն ինչ անել, որպեսզի նոր ընտրություններ կայանան ու նորմալ մարդիկ գան կառավարման ֆեդերացիայում, որպեսզի շարունակեն այն արդյունավետ աշխատանքը, որ որդեգրել էինք մենք և այն ձեռքբերումները, որ մենք ունեինք:
-Ձեր լիազորությունները վայր դրեցիք նաև այն նպատակով, որ նոր ընտրություններ կազմակերպվեն …
-Ոչ այնքան … Իմ անձի նկատմամբ կար քաղաքական հետապնդում, իմ հաշիվները կալանքի տակ են ու հնարավոր չէր այլևս կառավարել ֆեդերացիան, քանի որ ինչու պետք է իմ պատճառով տուժեն մարզիկները… ես որոշեցի դադարեցնել: Բայց, ցավոք, մինչև այսօր դեռ նոր ընտրություններ չեն կայացել ու ես շարունակում եմ աջակցել ֆեդերացիային: Բայց այսօր մենք Ֆեդերացիայի նախագահի ընտրությունների անցկացման լիազորությունը փոխանցել ենք ՀՀ ԿԳՄՍ նախարարությանը, որպեսզի իրենք անաչառ ընտրություններ անցկացնեն, ինչն ինձ իր պատվով է խոստացել նորանշանակ փոխնախարարը: Նա խոստացել է ամենաբարձր պատասխանատվությամբ շատ կարճ ժամկետներում ձեռնամուխ լինել ընտրությունների անցկացմանը: Դա շատ հեշտ է: Այն մարդիկ, ովքեր սպորտում խարդախություններ ու խաբեբայություններ են արել, ինչը չի կարող նպաստել մեր սպորտի զարգացմանը, իրավունք չեն ունենա մասնակցելու ընտրություններին: Կանոնակարգով ամրագրված բոլոր կետերը խստորեն կպահվեն ընտրությունների ընթացքում:
-Չե՞ք առաջադրի Ձեր թեկնածությունը:
-Ոչ: Ես ընտրվել էի օրինական ճանապարհով և կարող էի դեռ 5 տարի պաշտոնավարել: Հենց այստեղ է թաղված ձկան գլուխը: 2018 թվականի ընտրությունների շուրջ ստեղծված աղմուկն ամբողջությամբ սուտ էր և կեղծիք: Ասում էին՝ թե մենք հրատապ, հապճեպ կազմակերպեցինք ընտրությունները, չհասցրեցին գալ առաջադրվել, բայց բանից պարզվում է՝ այն երիտասարդը, որ պետք է գար առաջադրվեր, ՀՀ քաղաքացիություն չուներ և առհասարակ չէր կարող առաջադրվել: Սուտն ու կեղծիքը քողարկելով՝ անընդհատ փորձեցին աղմուկ բարձրացնել, ինչն իրենց մոտ հաջողվեց: Օլիմպիական կոմիտեն, ամեն ինչի մասին իմանալով, թելեց ու շարունակեց այդ սուտը: Այսինքն, ամեն ինչ անում էին հայկական սպորտը կործանելու, ևս մեկ աշխատող մարզաձև կործանելու, խանգարելու համար: Հիմա ես չկամ, ձեռքերս լվացել եմ: Աստված ձեզ հետ: Երկիրն ավելի լուրջ խնդիրների առաջ է կանգնած ու ես իմ անձի առջև ավելի լուրջ պատասխանատվություն եմ զգում զբաղվելու իմ երկրի փրկության հարցով, և ոչ թե այս կեղծարարների հետ նման խնդիրների մեջ էներգիաս ծախսել: Այնպես որ, թող նոր ընտրություններ կազմակերպեն, ընտրվեն: Աստված պահապան մեր մարզիկներին, մեր հավաքականին: Թող միայն հաջողություններ գրանցեն:
-Այսինքն պատրա՞ստ եք ամբողջովին թողնել ֆեդերացիան երկար տարիների ծավալած աշխատանքից հետո:
-Ստեղծվել են այնպիսի պայմաններ, որ ստիպված ես թողնել: 20 տարի թաղում են հայկական սպորտն ու դեռ ծիլեր ենք տալիս: Ինձ հաջողվեց մեր մարզաձևում բեկում մտցնել և ֆանտաստիկ արդյունքներ գրանցել, ունենալ հիանալի մարզիկներ և նոր անուններ հայկական սպորտում: Բայց երբ երկրում նման մթնոլորտ է ու նման գործելաոճ, քո լավ աշխատանքը դառնում է իրենց աչքի փուշը, քանի որ երբ դու լավ ես աշխատում, կամա թե ակամա ցույց ես տալիս իրենց անպիտան ու ոչ աշխատունակ լինելը: Ամբողջ խնդիրը հենց դրանում է: Դեռ կհասցնենք սպորտին անդրադառնալ ու սպորտը ոտքի կանգնեցնել: Հիմա ավելի կարևոր խնդիրներ կան: Հիմա ավելի շատ երկիրն է փրկել պետք, քանի որ իսկապես շատ ,շատ վատ վիճակում ենք:
-Նշեցիք՝ երկրի փրկության հարցով զբաղվելու պատասխանատվություն եք զգում: Ունե՞ք հստակ ծրագրեր այս առումով:
-Մենք երկիր ենք կորցրել, ու շարունակում ենք կորցնել, ինչի մասին է խոսքը: Ու այստեղ արդեն ոչ թե քաղաքականությունն է հարցը, այլ այն, որ հիմա կան հայեր և ոչ հայեր, կան դավաճաններ և ազգանվեր մարդիկ: Տարբերությունը դա է: Երբ ժամանակին սևերի ու սպիտակների էին բաժանում, մենք վրդովվում էինք, ասում էինք՝ ինչու են հասարակությունը բաժանում, բայց չէինք հասկանում, որ այս մարդիկ հստակ գիտակցում են՝ իրենք տականքն են, իսկ մյուս կողմում հայն է կանգնած: Եվ իրենք ամեն ինչ պետք է անեն հային սպանելու համար: Ու հիմա խնդիրն այն է, որ հայը պետք է պաշտպանվի՝ ուզած, թե չուզած: Ցանկացած քաղաքացի իր ամբողջ ներուժն ու էներգիան պետք է ուղղի հայրենիքի փրկությանը: Շատ ավելի կարևոր խնդիր ես այսօր երկրում չեմ տեսնում:
-Պարոն Գևորգյան, տևական ժամանակ է՝ բնակվում եք ԱՄՆ-ում: Հայաստան վերադառնալու մտադրություն կա՞:
-Իհարկե կա, բայց քանի դեռ Հայաստանի դատախազությունը կեղծիքով և ստով հետապնդումներ է իրականացնում իմ ընտանիքի նկատմամբ, ես ինչպե՞ս վերադառնամ: Այս պահին կա դատարանի վճիռը, որ երեք օրվա ընթացքում ամբողջ կալանքներն իմ հաշիվների և գույքի վրայից պետք է հանվի, բայց դատախազությունն անգամ դատարանի վճիռը չի կատարում… ամենակոպիտ օրենքի խախտմամբ, ինչի՞ մասին է խոսքը: Նման ագրեսիվ քաղաքական հետապնդում հնարավոր չէ նույնիսկ պատկերացնել, ինչի՞ց են վախենում,ինչո՞ւ են այսքան վախեցած:
Հայաստանի հետ կապերս խզե՞լ. իհարկե ոչ, դա իմ երկիրն է, իմ հոր արյան գնով պահած երկիրն է: Նման խոսակցություն ընդհանրապես չի էլ կարող լինել: Ես մինչև այսօր՝ չլինելով ֆեդերացիայի նախագահ, շարունակում եմ ֆինանսավորել, օգնել մարզիկներին, քանի դեռ չկա նոր թիմ, որը կաշխատի: Նախարարին խնդրել եմ հնարավորինս արագ կազմակերպել նոր ընտրություններ: Պետք է ապահովել խելացի, բանիմաց, գործից հասկացող և չհեղինակազրկված թեկնածուների առկայությունը, որ սուտասան չլինեն, անբարոյական չլինեն, ծառայեն մարզիկին ու մարզիկի հեղինակությանը, և ոչ՝ սեփական շահերին ու հեղինակությանը:
-ԿԳՄՍ փոխնախարար Կարեն Գիլոյանը վերջերս նշել էր,որ հանդիպում է ունենալու երկու ֆեդերացիների ներկայացուցիչների հետ: Եղա՞վ նման հանդիպում:
-Կարեն Գիլոյանը մինչ այս էլ իր հաղորդումների ընթացքում հրավիրել էր երկու կողմերին, բայց մյուս կողմը հրաժարվեց գալ, հետո հրավիրեց Օլիմպիական կոմիտեի և ֆեդերացիայի ներկայացուցիչներին, բայց Օլիմպիական կոմիտեից հրաժարվեցին գալ, որովհետև այնքան կեղծիք ու սուտ ունեն, որ չգիտեն ինչ ասել: Հիմա ինքը բոլորին լավ ճանաչում է ու բոլորին լավ գիտի: Գիլոյանն այն մարդն է, որ որպես սպորտային մեկնաբան սիրտը ցավացել է ու տագնապի մեջ է եղել մեր մարզիկների համար, նա գիտակցում է ու հասկանում է շատ բան: Կարծում եմ և ուզում եմ հավատալ, որ իր սկզբունքները փոխած չի լինի: Ես վստահել եմ նախարարությանն ու ընտրությունների անցկացման լիազորությունը փոխանցել եմ իրենց, որ բոլոր կողմերից հրավիրեն պատասխանատու մարդիկ և այնպես անեն, որ գոնե խոսակցություններ չլինեն: Մնացած հարցերը կարող եք իրենց ուղղել: Վերջիվերջո, դա որոշումով չէ: Ֆեդերացիայի անդամներն են քվեարկելու, մեր մարզիչներն ու ֆեդերացիայի անդամ հանդիսացող մարդիկ են ընտրում: Կանոնակարգով հստակ սահմանված է, թե ովքեր կարող են մասնակցել ընտրությանը, ովքեր կարող են առաջադրել իրենց թեկնածությունը: Խնդրեմ, բոլորին առաջ: Հայրենանվեր մարդկանց, ովքեր ցանկանում են որևէ բանով օգնել այս ավանդական մարզաձևին, կոչ եմ անում առաջադրվել, եթե ունեն թիմ, պլաններ ու հեռանկար, թե ինչպես կարելի է կառավարել ու արդյունքի հասնել: Որքան շատ լինեն մասնակիցները, այնքան հետաքրքիր կլինի:
-Նախորդ տարի նշանակված էր ՀԲՖ նախագահի ընտրություններ, սակայն դրանք այդպես էլ չկայացան: Ինչո՞ւ:
-AIBA-ում ոչ կայուն վիճակ էր, այնտեղ էլ էին գնում ընտրությունների: AIBA-ի ընտրությունները նոր են ավարտվել: Ինչպես գիտեք, Ռուսաստանի ներկայացուցիչ Ումար Կրեմլյովն ընտրվել է AIBA-ի նախագահի պաշտոնում: Նրա հետ մեր ֆեդերացիան ունի շատ-շատ ջերմ ու մտերմիկ հարաբերություններ ու կարծում եմ՝ դա շատ օգտակար կլինի հետագայում մեր հավաքականի համար: Այդ ընտրությունից անցել է մոտ 15 օր: Ու հիմա ճիշտ ժամանակն է, որ մենք էլ գնանք ընտրության: Այս ընթացքում ես փորձեցի որոշակի փոփոխություններ մտցնել կանոնադրության մեջ, որպեսզի ավելի շատ մարդիկ հնարավորություն ունենալ գալ և ընտրություններին մասնակցել: Մեր կանոնադրության մեջ հստակ գրված է, որ վերջին 2-3 տարում թեկնածուն անպայման պետք է լինի ֆեդերացիայի Գործադիր կոմիտեի անդամ, ու դա AIBA-ի պահանջն էր: Բայց ես նամակով դիմեցի AIBA-ին և խնդրեցի թույլ տալ փոփոխություններ անել կանոնակարգում և ավելի լայն շրջանակի մարդկանց հնարավորություն տալ մասնակցել ընտրություններին: Բայց որ այդ մարդը պարտադիր պետք է լինի ֆեդերացիայի անդամ, դրանում կասկած չկա: AIBA-ն համաձայնեց, բայց այն պայմանով, որ թեկնածուն պետք է առնվազն մեկ տարի լինի Հայաստանի բռնցքամարտի ֆեդերացիայի անդամ և չհանդիսանա մեկ այլ կառույցի անդամ: Ես մեկ տարի է՝ հորդորում եմ կարդալ ու ծանոթանալ կանոնադրությանը, որպեսզի հետո չբողոքեն, թե իրենց թույլ չեն տվել մասնակցել:
Դեռևս թեկնածուներ չկան: Գիտեմ, որ նախկինում Վիվառո ընկերությունն էր ցանկացել իր թեկնածուին առաջադրել, ինչը շատ շահավետ և արդյունավետ կլիներ հայկական բռնցքամարտի համար, և շատ ողջունելի էր: Մարդիկ, ովքեր ունեին ծրագրեր, ֆինանսական հնարավորություններ, մեծ կապեր սպորտում և մեր մարզիկներին ավելի մեծ ճանաչման տանելու հնարավորություն, լավ թիմ էր … Կարեն Գիլոյանին խնդրել եմ հանդիպումներ ունենալ այն մարդկանց հետ, ովքեր ցանկություն են ունեցել առաջադրվելու և համոզել, որ հետ չկանգնեն այդ մտքից: Ամեն դեպքում մեզ անհրաժեշտ է ուժեղ և ունակ թիմ, որպեսզի շահեն մեր մարզիկները: Նոր թեկնածուների առաջարկներն ու ծրագրերը նվազագույնը չեն կարող ցածր լինել մեր սահմանած նշաձողից: Իսկ մենք բավականին բարձր նշաձող ենք սահմանել: Պետական պարգևներից ավելի բարձր պարգևներ էին ստանում հայկական բռնցքամարտում: Մարզիչներն ու ամբողջ անձնակազմը մշտապես ստացել են ֆինանսական աջակցություն: Մեր մարզիկներն ուսումնամարզական հավաքներ են անցկացրել աշխարհի լավագույն մարզադահլիճներում և թիմերում: Այս ամենի շնորհիվ ենք մենք կարողացել լավագույն արդյունքները գրանցել բռնցքամարտում: Հենց դա էր պատճառը, որ բոլորը սևեռվեցին հայկական բռնցքամարտի դեմ, քանի որ իրենք ոչինչ չէին անում, բոլոր մարզաձևերում անկում էր, դժգոհություն, իսկ հայկական բռնցքամարտում կար աշխատանք և ծաղկում: Բոլորը սկսեցին պայքարել մեր դեմ: Բոլորը ասելով ՝ մեր երկրում կա մի կառույց, որն իշխում էր բոլորին, բացի բռնցքամարտից և շախմատից: Տարբերակ չկա. որտեղից՝ նեխած է ձկան գլուխը, հենց այդտեղից պետք է բուժել սպորտը:
Ամեն դեպքում, ես պատրաստ եմ ամեն ինչով շարունակել օգնել մեր բռնցքամարտիկներին, ֆեդերացիային, թող ընտրություն անեն ու արդար ընտրվեն: Ով էլ՝ ընտրվի, եթե ունենա իմ մասնագիտական հնարավորություններն օգտագործելու կարիքը, ես պատրաստ եմ օգնել բոլորին՝ հանուն հայկական բռնցքամարտի:
-Պարոն Գևորգյան, ինչպես հայտնի է՝ Տոկիոյի Օլիմպիական խաղերին բռնցքամարտի մրցաշարի կազմակերպմամբ ու անցկացմամբ զբաղվելու է ՄՕԿ-ը, իսկ ՕԽ-ի մասնակիցները որոշվելու են օլիմպիական կոմիտեների անցկացրած ներքին մրցաշարերի արդյունքում …
-Ոչ: AIBA-ի նախկին ղեկավարի հետ խնդիրներ կային ու ՄՕԿ-ը նման որոշում կայացրեց, բայց Ումար Կրեմլյովի ընտրությունից հետո կարծում եմ՝ շատ կարճ ժամանակահատվածում AIBA-ն կդառնա ՄՕԿ-ի անդամ և Օլիմպիական խաղերի ժամանակ մարզիկներին կներկայացնի AIBA-ն: Մարզիկի համար իրականում տարբերություն չկա, ինքը հանդես է գալիս Հայաստանի հավաքականում, բայց խնդիրը հենց այդտեղ է՝ չինովնիկը ցանկանում է ինքը որոշել, թե ով է լավ բռնցքամարտիկ, ով վատ: Օլիմպիական կոմիտեն կառավարչական մարմին է, և ոչ մասնագիտական, որպեսզի կարողանա որոշել բռնցքամարտի հավաքականի կազմը: Սա նորմալ չէ:
-Առաջիկայում նաև Ստրանջայի մրցաշարը կկայանա Բուլղարիայում, որին նախապատրաստվելու համար երկու հավաքականները կողք կողքի հավաք ունեցան Ծաղկաձորում: Ի վերջո, ինչպե՞ս է որոշվելու այդ մրցաշարին մեկնող մարզիկների կազմը:
-Ստրանջայի մրցաշարում որպես Հայաստանի ազգային հավաքական հանդես կգա մեր ֆեդերացիայի թիմը ու կներկայացնի մեր երկիրը: Մյուսների համար էլ է Ստրանջան բաց, նույնիսկ մարզադպրոցները կարող են մասնակցել այդ մրցաշարին: Բուլղարիայի ֆեդերացիայի նախագահն իմ ընկերն է, ես իր հետ խոսել եմ, ասել եմ՝ դեմ չեմ, որ ուրիշ մարզադպրոցներից ու ֆեդերացիա կոչվածներից էլ բռնցքամարտիկներ գան մասնակցեն, որովհետև ամեն դեպքում դա արվում է մարզիկի համար: Ես ուզում եմ՝ բոլոր մարզիկները մասնակցեն ու մասնագիտական փորձ ձեռք բերեն: Բայց նրանք արդեն կներկայացնեն իրենց մարզադպրոցը կամ ֆեդերացիան:
