VBET Հայաստանի Պրեմիեր լիգայում այսօր կայացավ 5-րդ տուրի 2 հանդիպում:
«Շիրակը» Գյումրիի քաղաքային մարզադաշտում ընդունել էր «Գանձասար-Կապանին» և պարտվեց 0:5 հաշվով: Ի դեպ, այդ խաղում դաշտի տիրոջ կարգավիճակում էին հանդես գալիս «Գանձասար-Կապանի» ֆուտբոլիստները:
Հանդիպման 20-րդ րոպեին Արզոյանը գրավեց սեփական դարպասը: «Գանձասար-Կապանի» կազմում դուբլի հեղինակ դարձավ Կրասնաուշկասը, մեկական անգամ էլ աչքի ընկան Անգուլոն ու Ադահը: Այս հաղթանակը Արմեն Պետրոսյանի թիմի համար առաջինն էր ընթացիկ մրցաշրջանում: «Գանձասար-Կապանը» 3 խաղից հետո ունի 4 միավոր: «Շիրակի» ակտիվում կա ընդամենը 1 միավոր, սակայն Գյումրիի թիմն անցկացրել է 2 հանդիպում:
Զուգահեռաբար ընթացող խաղում Վանաձորի «Լոռին» սեփական մարզադաշտում նվազագույն հաշվով հաղթեց «Փյունիկին»: Վանաձորյան թիմի կազմում աչքի ընկավ Կլաուդիրը: Այս հաղթանակից հետո «Լոռին» միավորների քանակը հասցրեց 6-ի և շրջանցեց իր այսօրվա մրցակցին, որն ունի 4 միավոր:
Հիշեցնենք, որ ընթացիկ առաջնությունում 100 տոկոսանցոց ցուցանիշ ունի Պրեմիեր լիգայի նորեկ, Չարենցավանի «Վանը», որն անցկացրած 3 խաղից հետո ունի 9 միավոր: 5-րդ տուրի հանդիպումը Սևադա Արզումանյանի թիմը կանցկացնի վաղը՝ օգոստոսի 24-ին, սեփական հարկի տակ ընդունելով «Ալաշկերտին»:
