Հայաստանի հավաքականի նախկին գլխավոր մարզիչ Վարդան Մինասյանն իտալական La Gazzetta Dello Sport-ի հետ զրույցում անդրադարձել է «Ռոմայի» ու Հայաստան հավաքականի ավագ և առաջատար կիսապաշտպան Հենրիխ Մխիթարյանին.
Առաջին տպավորության մասին.
«Նա խաղում էր «Փյունիկի» 3-րդ թիմում, երբ առաջին անգամ տեսա նրան։ 17 տարեկան էր, շատ նիհար։ Առաջին հայացքից տպավորությունն գրավիչ չէր, իսկ հետո նա վերցրեց գնդակը, ու այդ պահին «նոր աշխարհ» բացվեց։ Նա տաղանդ էր, որ երբեք ինձ չէր հանդիպել այդ տարածաշրջանում։ Մի անգամ մենք ընկերական խաղում առաջին կեսում 5 գոլ խփեցինք, ու ես փոխարինեցի նրան, սակայն նա այնպես զայրացավ, որ ես ստիպված էի նրան վերադարձնել խաղադաշտ։ Բնավորություն, կամք ու վճռականություն: Նա միայնակ կարող է հաղթել խաղերը»։
Խաղադաշտում՝ նրա իդեալական դիրքը.
«Նա հիանալի է տասը համարի դիրքում։ 4-2-3-1 տակտիկական դասավորվածությունում նա կարող է խաղալ գրեթե բոլոր դիրքերում»։
Աճը՝ հետզհետե.
«Նա չշտապեց, այո՛։ 2009 թվականին, Ֆրանսիայում կարիերան շարունակելու հնարավորություն ուներ, բայց ես նրան խորհուրդ տվեցի տեղափոխվել «Մետալուրգ»։ Նա հաջողեց, իսկ հիմա ելույթները շարունակում է Հռոմի «Ռոմայում»։ Եվրոպա լիգայում ես երկրպագելու եմ նրան»։
Հիշեցնենք, որ Մխիթարյանն առաջին հերթին Մինասյանի գլխավորությամբ մարզվել է «Փյունիկում», իսկ հետո՝ ազգային հավաքականում:
