Ֆուտբոլի Չեմպիոնների լիգայի խմբային փուլի վերջին տուրի շրջանակում «Բարսելոնան» հյուրընկալել էր «Յուվենտուսին»։ Երկու թիմերն էլ ապահովել էին տեղը փլեյ-օֆֆ փուլում։ «Կամպ Նոուում» որոշվում էր, թե որ թիմն է դուրս գալու խմբից առաջին տեղով։
Հանդիպման հաշիվը բացվեց 13-րդ րոպեին։ Իր իսկ վաստակած 11-մետրանոցն անվրեպ իրացրեց Կրիշտիանու Ռոնալդուն։ 20-րդ րոպեին հյուրերի տպավորիչ գրոհը գերազանց հարվածով եզրափակեց Վեստոն ՄաքԿենին։
52-րդ րոպեին տանտերերի դարպասին ևս մեկ 11-մետրանոց էր նշանակվել։ Ձեռքով էր խաղացել Կլեման Լենգլեն։ Նշակետից դարձյալ դիպուկ էր Կրիշտիանու Ռոնալդուն։ «Յուվենտուսը» հաղթեց 3-0 հաշվով ու միավորների քանակը հասցնելով 15-ի՝ հավասարվեց «Բարսելոնային» ու լրացուցիչ ցուցանիշներով զբաղեցրեց առաջին հորիզոնականը։
Խմբի մյուս խաղում վիճարկվում էր Եվրոպա լիգայի ուղեգիրը։ «Դինամո Կիևը» նվազագույն հաշվով առավելության հասավ «Ֆերենցվարոշի» նկատմամբ։ Խաղի միակ գնդակը 60-րդ րոպեին խփեց Դենիս Պոպովը։ «Դինամոն» 4 միավորով զբաղեցրեց 3-րդ տեղը խմբում ու նվաճեց Եվրոպա լիգայի ուղեգիր։