Ազգերի Լիգայի ընթացիկ խաղարկության խմբային փուլը մոտենում է ավարտին: Պայքարը հետաքրքիր ստացվեց մինչև վերջ:
Մինչև 5-րդ տուրի ավարտը առաջին տեղին հավականում էին Հայաստանը, Վրաստանն ու Հյ. Մակեդոնիան: Մեր հաղթանակը՝ վրացիների նկատմամբ, վերջիններիս զրկեց առաջին տեղը գրավելու հնարավորությունից: Դա վրացիների հեղինակությանը երկրորդ հարվածն էր վերջին շաբաթում: Առաջինը՝ ԵՎՐՈ-2020-ի ուղեգրի համար խաղում պարտությունն էր նույն մակեդոնացիներից: Սակայն վրացիների մասին խոսելու ժամանակը չէ:
Եկել է հայկական ֆուտբոլի խաղամակարդակն ինչ-որ աստիճանում կրկին չափելու փորձությունը: Իրականում, դժվար է խոսել խաղից, քանի որ երկրպագուների մի ստվար հատված պնդում է, որ պետք չէ հաղթել Հյ. Մակեդոնիային՝ Ազգերի Լիգայի մյուս շրջափուլում B դիվիզիոնում չհայտնվելու համար: Իսկ այնտեղ շատ ավելի բարդ կլինի ԵՎՐՈ-2024-ի ուղեգրի համար պայքարել: Երկրպագուների մի մեծ խումբ ու մասնագետներ պնդում են, որ պետք է հաղթել. նախ՝ մարզչական կազմի աշխատանքին որոշակի գնահատական տալու համար, և երկրորդ՝ ԱԱ եզրափակիչ փուլի ուղեգիր նվաճելու տեսական հնարավորությունները պահպանելու համար:
Մակեդոնացիներին հաղթել հնարավոր է, անշուշտ: Դա ապացուցեց առաջին խաղը, որտեղ մի շարք գործոններ խանգարեցին մեզ: Երկրորդ, մակեդոնացիների մի շարք առաջատարներ չեն լինելու խաղին՝ տարբեր պատճառներով: Սակայն միֆ է այն, որ նրանց հետաքրքրությունների շրջանակում չէ այս խաղը, քանի որ սա ուրիշ պատմության մասին ֆիլմ է: Այստեղ «հեռու» խաղասեղանին ԱԱ ուղեգիր է դրված:
Խաղը, ըստ գրաֆիկի, պետք է կայանար Երևանում, սակայն հայտնի դեպքերի պատճառով խաղը տեղափոխվեց մեր կողմից Կիպրոսի Նիկոսիա քաղաք: Նշեցինք, որ խաղին չեն լինելու մրցակցի մի շարք առաջատարներ, սակայն մենք ևս ունենք կորուստներ: Գաղտնիք չէ, որ մեր հավաքականի առաջատար Հենրիխ Մխիթարյանը մակեդոնացիների դեմ այս խաղին ևս չի լինի: Սա, իհարկե, տխրեցնող փաստ է, սակայն հիշելով վրացիների դեմ խաղը, և, ընդհանրապես, բոլոր խաղերն առանց Հենո, կարող ենք փաստել, որ մենք արդեն կարողանում ենք ինչ-որ չափով լրացնել մեր առաջատարի հարգելի բացակայությունը: Կիսապաշտպանությունում որակազրկումից կվերադառնա Անգուլոն, սակայն Ուդոյի վստահ խաղը՝ Վրաստանի դեմ, երկընտրանք կստեղծի Կապառոսի համար: Շատ հաճախ ասում են՝ հաղթող կազմը չեն փոխում: Միգուցե, հենց այս կարգախոսով էլ շարժվի Կապառոսը:
Նախորդ խաղի 4-4-2-ը վերջին շրջանում նորարարություն էր: Առջևի գծում անշուք տեսք ուներ Կարապետյան-Ադամյան զույգը: Չնայած, շատ հաճախ Ադամյանը եզր էր տեղափոխվում ու փորձում գործել հոգեհարազատ դիրքում, բայց արդյունքը նույնն էր: Ադամյանի՝ մինչև խաղավարտ խաղադաշտում գտնվելու իրավացիությունը փաստեց միայն նրա կողմից խփված հաղթական գնդակը, այլապես խաղից հետո նա վատագույններից մեկի կոչմանը կարժանանար:
- Հավանական մեկնարկային կազմ.
Այս խաղում, միգուցե, Կապառոսը վերադառնա 4-2-3-1 մարտավարությանը, որի արդյունքում մեկնարկային կազմում տեղ կգտնվի Արշակ Կորյանին: Դարպասում ու պաշտպանությունում, ըստ երևույթին, նույն կազմը կտեսնենք: Միգուցե, ձախ պաշտպանի դիրքում փոփոխություն լինի: Հենակետային գոտին կվստահվի Գրիգորյանին ու Ուդոյին: Եզրերում Ղազարյանն ու Բարսեղյանը կլինեն: Ենթահարձակվողի դիրքում, ինչպես նշեցինք, Կորյանին կարող է շանս տալ Կապառոսը, իսկ կեղծ 9 համարի դիրքում կարող է դաշտ դուրս գալ Սարգիս Ադամյանը. նրա համար, որ նա նախորդ խաղի հաղթական գոլի հեղինակն է: Կա, իհարկե, նաև Կարապետյանի տարբերակը:
- Դիմակայության պատմություն.
Մակեդոնիայի հետ խաղալու մեծ փորձ ունենք: Հանդիպել ենք 9 անգամ, որից 3-ում հաղթել ենք, խաղացել ենք 2 ոչ-ոքի ու պարտվել 4 խաղում: Ամենահիշարժանը, թերևս, 2012 թ-ի ԵԱ ընտրական փուլի Սկոպյեում կայացած դիմակայությունն է, որտեղ հաղթում էինք մինչև վերջին վայրկյանը, սակայն Արարատ Առաքելյանի ձեռքը չար կատակ խաղաց մեզ հետ: 2018 թ-ին Ազգերի Լիգայի նախորդ խաղարկության շրջանակում Երևանում 4-0 հաշվով ջախջախեցինք մակեդոնացիներին. այն նույն մակեդոնացիներին, որոնք օրեր առաջ ԵՎՐՈ-2020-ի ուղեգիր նվաճեցին:
Ամփոփելով, կարող ենք փաստել, որ ամեն դեպքում հաղթանակը միանգամայն իրատեսական է, և պետք է հաղթել նաև ա՛յս պահի համար:
Արմեն Գարամյան