Գևորգ Ղազարյանի պատասխանն Աբրահամ Խաշմանյանին

Ֆուտբոլի Հայաստանի հավաքականի կիսապաշտպան Գևորգ Ղազարյանը կոշտ պատասխան է տվել հավաքականի գլխավոր մարզիչ Աբրահամ Խաշմանյանին՝ վերջերս արած հայտարարության համար:

Հիշեցնենք, որ  Խաշմանյանն Իտալիայի հավաքականից կրած պարտությունից հետո նշել էր, որ «Սա ազգային հավաքական չէ, այլ պարզապես հավաքական», իսկ հետո պարզաբանել էր, որ իր բառերն ուղղված չեն եղել ֆուտբոլիստներին:

Ստորև ներկայացնում ենք Գևորգ Ղազարյանի ֆեյսբուքյան գրառումը.

Հարգելի երկրպագուներ ,

Ուզում եմ , նախևառաջ , ներողություն խնդրել գրանցված 9-1 հաշվի համար: Կարդալով գլխավոր մարզչի մեկնաբանությունը, որ ինքը նկատի չի ունեցել ֆուտբոլիստներին, այլ նկատի է ունեցել այն մարդկանց, ովքեր չեն մեկնել հավաքականի հետ Իտալիա ու բողոքում է կազմակերպչական հարցերից, ուզում եմ շեշտել, որ ինչ ես խաղում եմ Հայաստանի ազգային հավաքականում, 2007 թ-ից հավաքականը միշտ կազմակերպչական հարցերի խնդիր չի ունեցել :

Իր խոսքերը ապշելու աստիճան անտրամաբանական են, երբ նա հայտարարում է, որ սա ազգային հավաքական չէ, այլ ուղակի հավաքական , այն դեպքում, երբ գրեթե մի ամբողջ կազմ բացակայում էր ու ասում է, որ դա ասելով ի նկատի է ունեցել Ֆեդերացիայի աշխատակազմին :

Չեմ կարծում, որ ֆեդերացիայի որևէ աշխատակից վնասվածք է ունեցել կամ համարվել հիմնական կազմի խաղացող: Ու ընդհանրապես, նրա արած մեկնաբանությունը ոչ մի կապ չունի խաղի և առավել ևս 9-1 հաշվի հետ : Իր ասածը իտալերենով շատ ուղիղ թարգմանվեց, որ սա ազգային հավաքական չէ, այլ ուղղակի հավաքական է առանց ֆունդամենտալ (առանցքային ) խաղացողի: Երբևէ չեմ տեսել մի մարզչի կամ ֆուտբոլիստի, որ խաղի արդյունքը կապի նրա հետ, թե ֆեդերացիայից ով է մեկնում թիմի հետ, ով՝ չէ :

Նշեմ, որ հավաքականի այլ խաղերի ժամանակ էլ բազմաթիվ լրագողներ, ֆեդերացիայի աշխատակիցներ, երբեմն երկրպագուներ են եղել մեզ հետ՝ նույն ինքնաթիռում , հյուրանոցում : Ավելի լավ է խոսի, թե ինչու՞ մեր հավաքականը իր օրոք ամենախոշոր հաշվով պարտությունը կրեց պատմության մեջ, իսկ եթե չգիտի, թե ինչու, ավելի լավ է այսքան օր անց գոնե մեկ անգամ ներողություն խնդրեր հայ ազգից ու հայ ժողովրդից՝ այս խայտառակության համար, այլ ոչ թե խոսեր անտրամաբանական բաներ:

Եկեք չմոռանանք, որ ընդամենը երկու ամիս առաջ այս նույն հաաքականը լավ հնարավորություն ուներ Եվրոպայի առաջնության եզրափակիչ փուլի ուղեգիր նվաճելու և հավատում եմ, որ այս կազմը կարող է հաջողություններ գրանցել::