Հայաստանի Առաջին խմբի առաջնության երկրորդ տուրի մեկնարկային խաղում «Սևանը» հյուրընկալվելիս մրցել է «Փյունիկ-2»-ի հետ և 3 անպատասխան գնդակ է ուղարկել տանտերերի դարպասը:
«Սևանի» կազմում գոլեր են հեղինակել Վահագն Այվազյանը, Արամ Լոռեցյանն ու Արեգ Ազատյանը:
Անցկացրած երկու խաղից հետո «Սևանը» 6 միավոր ունի իր ակտիվում ու գլխավորում է Առաջին խմբի մրցաշարային աղյուսակը:
Օրվա մյուս խաղում «Ուրարտու-2»-ը հյուրընկալել էր «Շիրակ-2»-ին և 3-1 հաշվով կամային հաղթանակ է տարել:
Արդեն 7-րդ րոպեին գյումրեցիները անկյունայինի խաղարկումից հետո բացել են հաշիվը։ Աչքի է ընկել Առլեն Ծատուրյանը։ Արդեն 20 րոպե անց «Ուրարտուի» բազմաքայլ կոմբինացիայի արդյունքում մրցակցի դարպասը գրավել է Արթուր Միսկիրիջյանը։ 40-րդ րոպեին «Ուրարտու-2»-ի ֆուտբոլիստները դարձյալ ձախ եզրից հերթական արդյունավետ գրոհն են կազմակերպել։ Այս անգամ էլ աչքի է ընկել Գոռ Լուլուկյանը։ Թիմերն ընդմիջման են գնացել հենց այս հաշվի ներքո։
Երկրորդ կեսում Ռոբերտ Արզումանյանի գլխավորած թիմի ֆուտբոլիստները կարողացել են մեծացնել հաշվի տարբերությունը։ Էրիկ Փիլոյանը խորքից առաջադիմելով, ապակողմնորոշել է «Շիրակ-2»-ի մի քանի ֆուտբոլիստների ու հարվածային դիրքի դուրս բերեց Սամվել Հակոբյանին, որն էլ հաշիվը դարձրել է 3-1։ Հանդիպումն այդպես էլ ավարտվել է:
Ռոբերտ Արզումանյանի գլխավորությամբ սա «Ուրարտու-2»-ի առաջին հաղթանակն էր նոր մեկնարկած առաջնությունում։
Երկրորդ տուրի ևս մեկ հանդիպում կկայանա վաղը՝ օգոստոսի 20-ին: «Լեռնային Արցախը» Էջմիածնի «Քաղաքային մարզադաշտում» կընդունի «Արարատ-Արմենիա-2»-ին, խաղը կմեկնարկի ժամը 17:15-ին:
Օգոստոսի 21-ին «Վեստ Արմենիան» դարձյալ Էջմիածնում կընդունի «Նորավանքին», իսկ օգոստոսի 22-ին ԲԿՄԱ-ն Ավանի ակադեմիայի մարզադաշտում կընդունի «Ալաշկերտ-2»-ին: Երկու խաղն էլ կմեկնարկի ժամը 17:15-ին:
