28-ամյա Վահագն Այվազյանն ընթացիկ մրցաշրջանի ավարտից հետո հեռացավ հարազատ «Ուրարտուից» և համալրեց Չարենցավանի «Վանի» կազմը, որն այս տարի Բարձրագույն խմբում կանցկացնի իր նորամուտի մրցաշրջանը։
ArmSport-ի հետ զրույցում Վահագն Այվազյանը պատմել է «Վան» տեղափոխության, ակումբի և Հայաստանի հավաքականի հետ կապված իր նպատակների մասին, ինչպես նաև անդրադարձել «Ուրարտուից» հեռանալուն, որի կազմում ավարտված մրցաշրջանում Հայաստանի առաջնության մեկ հանդիպման մասնակցեց՝ խաղադաշտում անցկացնելով ընդամենը 7 րոպե։
-Վահագն, «Վան» տեղափոխությունն ինչպե՞ս ստացվեց։
-Հրավեր եղավ «Վանից» ու որոշեցի տեղափոխվել այդ ակումբ։ Նախ, «Վանում» աշխատում են այնպիսի մարդիկ, ովքեր ծանոթ են իմ ֆուտբոլային կարողություններին և հնարավորություններին։ Հիմնականում Կարեն Բարսեղյանը և Սևադա Արզումանյանը խթան հանդիսացան այս ակումբ տեղափոխվելու հարցում։ Եվ արդեն իսկ՝ լինելով ակումբի ներսում, շատ լավ տպավորություններ ունեմ «Վանից», ամբողջ թիմն ունի լուրջ նպատակներ և հստակ գիտի՝ ուր է շարժվում ակումբը, ինչը շատ կարևոր է։ Կային առաջարկներ ներքին առաջնությունից, բայց հաշվի առնելով ընտանեկան իրավիճակը՝ չէի կարող մարզ տեղափոխվել և ապրել այնտեղ։ «Վանն» ամենալավ ու ամենահարմար տարբերակն էր իմ կարիերայի շարունակության համար։
-Օրերս ընկերական խաղ անցկացրիք «Փյունիկի» հետ, ինքդ էլ գոլի հեղինակ դարձար ու նպաստեցիր քո թիմի հաղթանակին։ Այդ խաղի և առհասարակ նոր մրցաշրջանի նախապատրաստության մասին ի՞նչ կասես։
-«Փյունիկի» հետ լավ խաղ ստացվեց։ Ընդհանրապես չզգացվեց, որ ընկերական հանդիպում է, պաշտոնական խաղի տպավորություն թողեց, երկու թիմն էլ պայքարեցին ու խաղից ստացան դրական էմոցիաներ։ Ճիշտ ժամանակին սկսել ենք նախապատրաստական շրջանը։ Արդեն ընկերական խաղեր ենք անցկացրել նաև «Գանձասար-Կապանի», «Ուրարտուի» և «Ալաշկերտի» հետ։ Այս փուլում շատ կարևոր են ընկերական խաղերը։ Մարզչական շտաբն ամեն ինչ անում է, որպեսզի կազմ և պատրաստ լինենք առաջնության մեկնարկին։
-Իսկ քեզ ինչպե՞ս ընդունեցին թիմում, ինչպիսի՞ կոլեկտիվ է հավաքվել «Վանում»։
-Շատ լավ տղաներ են հավաքված թիմում, անձնակազմն էլ ընդհանուր առմամբ շատ պրոֆեսիոնալ է։ Ինձ շատ լավ են ընդունել, ինչը շատ է հեշտացնում ադապտացիոն փուլը։
-Առաջիկա մրցաշրջանից ի՞նչ սպասելիքներ ունես։
-Անձամբ ես նպատակ ունեմ մարզավիճակս վերականգնելու, նորից գոլեր խփելու և հնարավորինս օգտակար լինելու թիմին։ Չէի ասի, որ վատ մարզավիճակում եմ եղել թե՛ Օմանում, թե՛ Օմանից վերադառնալիս՝ Հայաստանում։
Ինչ վերաբերում է Բարձրագույն խմբում «Վանի» հեռանկարներին, պետք է ասեմ, որ շատ կազմակերպված թիմ ունենք ու յուրաքանչյուր թիմի համար շատ բարդ է լինելու մրցել «Վանի» հետ։ Մեր նպատակը լինելու է յուրաքանչյուր խաղում հաղթանակի ձգտելն ու Բարձրագույն խմբում որպես ամուր և հեռուն գնացող նպատակներ ունեցող ակումբ ամրապնդվելը։
-Իսկ նախորդ մրցաշրջանն ինչպե՞ս կամփոփես քեզ համար։
-Առաջնությունը մեկնարկեց ու մի քանի խաղ հետո տեղափոխվեցի Օման։ Այնտեղ կես մրցաշրջան անցկացնելուց հետո վերադարձա հայրենիք։ Օմանում բավականին լավ հանդիպումներ եմ ունեցել, մասնակցել եմ գրեթե բոլոր խաղերին՝ դաշտ դուրս գալով հիմնական կազմում։ Պարզապես Օմանի առաջնությունից տեղեկությունները շատ չէին, որովհետև ներքին առաջնության մեդիա դաշտն այնքան էլ հագեցած չէր, որքան՝ Հայաստանում է։ Խաղերն էլ միայն տեղի հեռուստաալիքով և օնլայն տարբերակով էին հեռարձակվում, ուստի տեղեկություններն այդքան էլ շատ չէին, այդ իսկ պատճառով՝ կարծես աննկատ էի, բայց փաստն այն է,որ լավ հանդիպումներ անցկացրել եմ այդ ժամանակահատվածում։
Վերադառնալով Հայաստան ՝ կար երրորդ ակումբ տեղափոխվելու խնդիր, բոլորդ էլ գիտեք ինձ հետ կապված հայտնի պատմությունը, ու ես հնարավորություն ունեի հանդես գալու միայն «Ուրարտուում», ուստի «Ուրարտուն» ընդառաջեց և շատ արագ, վերջին պահին լուծվեցին ակումբային հարցերս։ Հարցի մյուս կողմին կդժվարանամ պատասխանել, որովհետև ես ինքս չհասկացա, թե ինչու խաղաժամանակ չստացա «Ուրարտուում» և առաջնությունն ավարտեցի այստեղ, եթե չեմ սխալվում, 1 հանդիպման փոխարինման դուրս գալով և դաշտում 7 րոպե անցկացնելով։
-Նշեցիր, որ քեզ համար էլ էր այդ փաստն անհասկանալի։ Կարելի՞ է ենթադրել, որ մարզումներն ու մարզչական շտաբի հետ հարաբերությունները լավ էին և որևէ խնդիր այդ առումով չկար։
-Այո, շատ լավ հարաբերությունների մեջ եմ եղել մարզչական շտաբի հետ։ Ես բնույթով հանգիստ մարդ եմ, ընդհանրապես կոնֆլիկտային չեմ, ուստի ամեն ինչ հարթ էր այդ առումով։ Մարզումներին ամեն բան արել եմ 120%-ով։ Չեմ կարող ասել, թե ինչու այդպես ստացվեց։
-Ինչպես գիտես, Հայաստանի առաջնությունում առաջիկա մրցաշրջանից լեգեոներների որոշակի սահմանափակում է մտցվելու։ Ի՞նչ կարծիք ունես այս մասին։
-Իհարկե կողմ եմ, և կարծում եմ, որ միևնույն է՝ էլի քիչ է։ Պետք է ավելի շատ հայ ֆուտբոլիստներ լինեն մեկնարկային կազմում։ Եթե մենք կարողանում ենք երիտասարդ լեգեոներին կամ առհասարակ լեգեոներներին հնարավորություն տալ իրենց դրսևորելու, ուրեմն պարտավոր ենք մեր հայ երիտասարդներին էլ այդքան հնարավորություններ տալ։ Ես վստահ եմ, որ մեր հայ ֆուտբոլիստներն ավելի պատվով և ավելի որակով խաղ կցուցադրեն։ Նրանց միայն հնարավորություն տվեք, վստահություն և այնքան խաղաժամանակ, որքան՝ լեգեոներներին եք տրամադրում։
-Իսկ հաշվի առնելով այն, որ Ազգային հավաքականում նոր մարզիչ ունենք, ով խոստացել է՝ բոլոր հայ խաղացողներին ուշադրություն է դարձնելու, քո սպասելիքներն այս առումով ինչպիսի՞ն են։
-Ես ամեն ինչ արել եմ, անում եմ և կանեմ, որ որակով խաղ ցուցադրեմ, լինեմ լավ մարզավիճակում և օգտակար լինեմ թիմիս։ Այդ ամենը եթե լինի, այդ ժամանակ էլ սպասելիքներս կարդարանան հավաքականի հետ կապված։
Նարե Հովհաննիսյան
