Ֆուտբոլային սկաուտ․ Դեղձանիկները դեռ կճախրեն ֆուտբոլային երկնակամարում

Այսօրվա մեր հերոսները կլինեն անգլիական «Նորվիչի» երիտասարդ և հեռանկարային ֆուտբոլիստները։ «Դեղձանիկները» ԱՊԼ-ի հետնապահներն են, նրանք տեսականորեն դեռ հնարավորություն ունեն պահպանել իրենց տեղը Պրեմիեր Լիգայում, սակայն դա բավականին բարդ առաջադրանք կլինի համեստ ակումբի համար։ Եվ չնայած նրանց զբաղեցրած դիրքին՝ այս թիմը համալրված է հեռանկարային մի շարք ֆուտբոլիստներով, որոնց հաջորդ մրցաշրջանում, ամենայն հավանականությամբ, կտեսնենք կարգով ավելի բարձր ակումբներում։

Ջամալ Լյուիս

🏴󠁧󠁢󠁥󠁮󠁧󠁿Հյուսիսային Իռլանդիա
22 տարեկան
«Նորվիչ»

Ջամալը «Նորվիչի» սան է։ Նա արդեն երրորդ մրցաշրջանն է, ինչ համարվում է թիմի հիմնական ձախ պաշտպանը։ Դեռ նախորդ մրցաշրջանում, երբ Լյուիսը իր թիմին օգնում էր Չեմպիոնշիփից դուրս գալ Պրեմիեր Լիգա, նրա նկատմամբ սկսել էին հետաքրքրություն ցուցաբերել ԱՊԼ-ի մի շարք ակումբներ։ Սակայն երիտասարդ ֆուտբոլիստը նախընտրեց այս մրցաշրջանում ևս մնալ «դեղձանիկների» ճամբարում, որպեսզի օգնի իր հարազատ թիմին պահպանել տեղը և ամրապնդվել ԱՊԼ-ում։ Առաջադրանքը, մեղմ ասած, ոչ բավարար արդյունքով են իրականացնում «Նորվիչի» ֆուտբոլիստները, սակայն դա ամենևին չի նսեմացնում Հյուսիսայի Իռլանդիայի հավաքականի պաշտպանի և այսօրվա մեր մյուս հերոսների արժանիքները։ Նրանք բոլորը դեռ երիտասարդ են, և նրանց ճանապարհը դեռ նոր է կառուցվում մեծ ֆուտբոլում։

Մաքս Արոնս

🏴󠁧󠁢󠁥󠁮󠁧󠁿Անգլիա
20 տարեկան
«Նորվիչ»

Եթե Ջամալը պատասխանատու է թիմի ձախ եզրի համար, ապա Մաքսը իր վրա է ստանձնում աջ եզրը։ Արոնսը, ինչպես և մեր նախորդ հերոսը, ևս «Նորվիչի» սան է և նախորդ տարի նա նույնպես օգնեց իր թիմին դուրս գալ ԱՊԼ։ Սա նրա երկրորդ լիարժեք մրցաշրջանն է մեծ ֆուտբոլում։ Բացի այդ, Արոնսը նաև Անգլիայի երիտասարդական հավաքականի խաղացող է և միշտ գտնվում է ավելի բարձրակարգ ակումբների սկաուտների դիտակետում։ Եվ Մաքսը, և Ջամալը աչքի են ընկնում բավականին լավ արագությամբ և ֆիզպատրաստվածությամբ, սակայն նրանք ավելի շատ դավանում են մրցակիցների գրոհները քանդող-վնասազերծող ֆուտբոլին և դեռևս ավելացնելու տեղ ունեն թիմի գրոհները պաշտպանությունից սկսելու ասպեկտում։

Բեն Գոդֆրի

🏴󠁧󠁢󠁥󠁮󠁧󠁿Անգլիա
22 տարեկան
«Նորվիչ»

Պաշտպանության եզրերի մասին արդեն խոսեցինք, իսկ ահա կենտրոնում հանդես է գալիս Գոդֆրին, ֆուտբոլիստ, ում տրանսֆերի համար համառ պայքար են մղում լոնդոնյան երկու գրանդները՝ «Տոտենհեմը» և «Արսենալը»։ Գոդֆրին իր տարիքի համար բավականին հասուն ֆուտբոլ է ցուցադրում, աչքի է ընկնում առաջատարի հատկանիշներով և բացի նրանից, որ հաջողությամբ վնասազերծում է մրցակիցների հարձակվողներին, բավականին գրագետ սկսում է իր թիմի դիրքային գրոհները պաշտպանությունից։ Կպահպանի իր տեղը «Նորվիչը» ԱՊԼ-ում, թե՞ ոչ․ Բեն անունով «դեղձանիկն», ամենայն հավանականությամբ, կլքի թռչնաբունը՝ միանալով էլ ավելի բարձր թռչող երամի․․․

Էմիլիանո Բուենդիա

🇦🇷 Արգենտինա
23 տարեկան
«Նորվիչ»

Արգենտինացի ունիվերսալ կիսապաշտպանը «Նորվիչի» կազմը համալրել է նախորդ տարի։ «Խետաֆեի» նախկին ֆուտբոլիստը շատ կարճ ժամանակահատվածում դարձավ թիմի առաջատարներից մեկը, և նրա խփած 8 գնդակները ևս իրենց լուման ունեցան թիմի՝ ԱՊԼ ուղեգիր նվաճելու հարցում։ Սակայն այս մրցաշրջանում նրա պարտականությունները փոքր-ինչ փոխվեցին, և նրա գլխավոր խնդիրը դարձել է ոչ թե գրոհների եզրափակումը, այլ խաղընկերների համար գոլային հնարավորություններ ստեղծելը։ Ֆուտբոլիստը թիմի լավագույն դիսպետչերն է, ով արդեն 7 գոլային փոխանցում է կատարել այս մրցաշրջանում։ Բուենդիան հինականում հանդես է գալիս կիսապաշտպանության աջ եզրում, սակայն նա բավականին մեծ հաջողությամբ կատարում է նաև թիմի ենթահարձակվողի դերը և հարկ եղած դեպքում տեղափոխվում նաև հակառակ՝ ձախ եզր։

Թոդ Քենթվիլ

🏴󠁧󠁢󠁥󠁮󠁧󠁿Անգլիա
22 տարեկան
«Նորվիչ»

Անգլիացի կիսապաշտպանը «Նորվիչի» գլխավոր ակտիվներից մեկն է, թիմի ևս մեկ սան և տրանսֆերային շուկայում ամենացանկալի լոտերից մեկը։ «Նորվիչը» իր սկաուզերին (թիմի սան հանդիսացող ֆուտբոլիստ) տեսնում է որպես «դեղձանիկների» երամի ապագա առաջնորդ, ով հետագայում կդառնա թիմի առաջատարը և կօգնի թիմին ամրապնդվել անգլիական ֆուտբոլի բարձրագույն լիգայում, սակայն ներկայիս պայմաններում դժվար կինի պահպանել նման տաղանդավոր ֆուտբոլիստին։ ԱՊԼ-ի մի շարք ակումբներ հետևում են Քենթվիլի առաջընթացին, և հասկանալի է, որ ֆուտբոլիստն անձամբ, սեփական առաջընթացի մասին մտածելով, կարող է փոխել ակումբային գրանցումը։ Չնայած, առաջ չընկնենք, և ժամանակը ցույց կտա՝ ինչպես կդասավորվեն իրադարձությունները։ Ինչ վերաբերվում է այս մրցաշրջանում ֆուտբոլիստի ելույթներին՝ երիտասարդ անգլիացին թիմի երկրորդ արդյունավետ ֆուտբոլիստն է (ֆինն հարձակվող Պուկիից հետո), ով արդեն աչքի է ընկել 6 խփած գնդակներով և կատարել է 3 գոլային փոխանցում։ Առանձնանում է բավականին լավ տեխնիկայով, արագությամբ, դաշտը լավ տեսնելու ունակությամբ և արգենտինացի Բուենդիայի հետ միասին հանդիսանում է թիմի գրոհների հիմնական շարժիչ ուժը։

Վար Բաբայան

Շարքի նախորդ մասերը

Շոտլանդիայի առաջնության ամենահեռանկարային ֆուտբոլիստները

Լավագույնները Ա Սերիայի նկուղում

Ամերիկացիների երիտասարդ դեսանտը Եվրոպայում

Բեռլինում նոր աստղեր են հասունանում

Այս հիանալի Զալցբուրգը․․․

Երիտասարդ գլադբախցիներն ու դեղագործները՝ համաշխարհային ֆուտբոլի ապագա աստղեր

Ֆրանսիայի առաջնության գլխավոր բացահայտումները

Հաշվենկատ Վերոնան և հավակնոտ Բոլոնյան՝ ցատկահարթակ ֆուտբոլային էլիտա

Քեյ-ֆուտբոլի (K-Football) ակնկալիքով

Երիտասարդ աղվեսների ոդիսականը շարունակվում է